Suleqatigiissitsisut Sermersuumi issiavinnattut
Kommuneqarfik Sermersuup kommunalbestyrelsia nutaanik marlunnik ilaasortaatitaqalissaaq. Taamaasillutik Suleqatigiissitsisut kommunalpolitikkimi aamma ilaasortaatitaqalissapput
Demokraatininngaanneersup Nivi Olsenip Inuit Ataqatigiinninngaanneersullu Malene Lyngep sulinngiffeqarallarnissaat pissutigalugu Suleqatigiissitsisuninngaanneersoq Michael Rosing Inuit Ataqatigiininngaanneersorlu Charlotte Pike paarlattaassapput.
Qinnuteqaatit
Kommunalbestyrelsi ullumi ataatsimiileruni sulinngiffeqarnissamik qinnuteqaatit taakku marluk ulloq 1. septembarimiit atuutilertussat oqaluuserissavaat.
Malene Lynge Københavnimi ilinniaqqinnissani pissutigalugu sulinngiffeqarallarnissamik qinnuteqaatini tunngavilersorpaa.
Nivi Olsenip niuertarfimmik ingerlatsinissaq ilaqutariinnermillu peqquteqartumik sulinngiffeqarallarnissamik qinnuteqaat ulloq 1. marts 2019 tungaanut atuuttussaq tunngavilersorpaa.
Tillie naaggaartoq
Demokraatini ilaasortaasimasoq maanna Suleqatigiissitsisuni ilaasortaq Tillie Martinussen Demokraatinut siullertut sinniisussaasimasoq Inatsisartuni ulapputeqarnini pissutigalugu paarlaanissamut naaggaarpoq. Taamaammat sinniisussap tullia Michael Rosing politikkimik suliaqaqqilissaaq.
Demokraatininngaanneersoq Randi Vestergaard Evaldsen Sermitsiaq.AG-mut paasissutissiivoq Michael Rosing Nivi Olsenip Meeqqanut Atuarfeqarnermullu Ataatsimiititaliami ilaasortaaffigisimasaani paarlattaassasoq. Nivi Olsen tassani siulittaasuusimavoq. Ataatsimiititaliaq kingusinnerusukkut nutaamik siulittaasussarsiussaaq.
- Michael Rosingip Meeqqanut Atuarfeqarnermullu Ataatsimiititaliami ilaasortanngorsinnaaneranik mattusserusunngilagut, Randi Vestergaard Evaldsen paasissutissiivoq.
Randi borgmesterimut siullertut sinniisussanngortoq
Randi Vestergaard Evaldsenip paasissutissiaraa, borgmesterimut siullertut sinniisussanngorluni.
Inuit Ataqatigiinninngaanneersoq Charlotte Pike Ittoqqortoormiini najugaqartoq Sanarfinermut Avatangiisinullu Ataatsimiititaliami aamma Aningaasaqarnermut Suliffeqarnermullu Ataatsimiititaliami ilaasortanngussaaq.
DMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...