Suliffeqarfiit maanna fast-trackimut isumaqatigiissut atorsinnaalerpaat
Fast-tracki qangali utaqqisaasoq, nunanit allaniit sulisussanik aallernermi ajornaallisaasussaq kiisami inissinneqarpoq. Isumaqatigiissut septembarip 24-ani atuutsinneqalissasoq, Naalakkersuisut paasissutissiipput.
Nunanit allaniit nunatsinni sulilersitsinerni maanna eqaallisarneqarpoq. Sulisoqarnermut Naalakkersuisoq, Mimi Karlsen aamma Danmarkimi Nunanut allanut nunasisullu qallunaanut ilanngutivinnissaannut ministeri, Mattias Tesfaye isumaqatigiissut naammassillugu isumaqatigiissutigaat.
- Nuannerpoq suliffeqarfiit nunanit allaniit sulisussanik amigaateqartut, sulisussaminnik amigaatigisaminnik sulilersitsisinnaanisaminnut periarfissaqalermata siornatigorniik sukkanerusumik, Isumaginninnermut Sulisoqarnermullu Naalakkersuisoq, Mimi Karlsen oqarpoq.
Suliffeqarfiit akuerisaassapput
Kalaallit Nunaanut suliartorusulluni qinnuteqartoq maanna Nunatsinni najugaqarnissamut sulinissamullu akuersissuteqareersinnaanngorpoq. Suliffeqarfik suliartorfiginiagaq Namminersorlutik oqartussat allattorsimaffianni suliffeqarfiit akuerineqarallarsimasut akornanniippat taava Nunatsinnut suliartorsinnaaneq ajornaanerulissaaq.
- Namminersorlutik oqartussat suliffeqarfinnik akuerineqarallarsinnaasunik allattuipput. Allattuiffimmiissinnaanissamut piumasaqaataavoq, akissarsiat atorfeqarnermilu atugassat Kalaallit Nunaanni pissutsinut tulluuttuunissaat, taavalu sulinermi immikkut isigisariaqartunik peqarnissaa, soorlu immikkut ittumik amigaateqarneq, Naalakkersuisut paasissutissiipput.
Nunanit allaniit sulisussarsiorneq suliffissaaleqinerup annikilleqanerata nalaani atuuttassaaq. Aaqqissuusinerlu unitsinneqarallarsinnaavoq suliffissaaleqinerup annertusiffiini. Tassa suliffeqarfiit ajornaanerususimik Nunatsinneersunik atorfinititsisinnaanngoraangata.