Suliffissaqarneq ilinniartitaanerlu pillugit ataatsimeersuarneq: Inuusuttut innersuussuteqassapput
Ilinniarnissamut sulilernissamullu piareersimaneq pillugu inuusuttut 40-t ulluni marlunni ataatsimeersuarnermut peqataapput. Inuusuttut sulilernissamut qanoq piareersimalernissaat pillugit inuusuttut namminneq siunnersuuteqarnissaat, ataatsimeersuarnermi siunertaavoq.
Ataatsimeersuarneq sivisuumik kissaatigineqarsimasoq sapaatip-akunnerani matumani ingerlanneqaqqammerpoq. Ataatsimeersuarneq marlunngornermi pingasunngornermilu ingerlanneqarpoq.
Inuusuttut 40-t nunaqarfinnit illoqarfinniillu minnernit Sisimiuni ataatsimeersuartitsinermut peqataapput, inuusuttunullu ilinniakkamik ingerlataqanngitsunut imaluunniit sulinngitsunut aaqqiissutissanik siunnersuutinik oqallisiginnipput.
- Inuusuttut naalakkersuinermik ingerlataqartunut namminneq siunnersuutaat oqariartuutaallu tusassallugit assut pissagagivakka. Ataatsimeersuarnerup kingorna inuusuttut oqariartuutaat Naalakkersuisunut Inatsisartunullu saqqummiunneqarnissaat qilanaarivara, Isumaginninnermut, Ilaqutariinnermut, Suliffeqarnermut Nunamullu Namminermut Naalakkersuisoq, Jess Svane, tusagassiuutinut nalunaarummi oqaaseqarpoq.
Meeqqat atuarfiata aamma inersimasutut inuunerup akornanni aqqut
Inuusuttut nammineerlutik meeqqat atuarfiannit inuussutissarsiornermut imaluunniit ilinniagaqarnermut alloriarnissap tulliata qanoq ajornannginnerulersinnaaneranut siunnersuuteqarnissaat, ataatsimeersuarnermi pilersaarutaavoq.
Inuusuttut ilinniagaqanngitsut imaluunniit suliffeqanngitsut politikerit sivisuumik eqqarsaatiginikuuaat.
Inuusuttut partiinut oqariartuutaat ilaatigut meeqqat atuarfiannit ilinniartitaanermi aamma suliffeqarfeqarnermi ingerlariaqqinnissamut pitsaanerusunik pilersitsinissamut atorneqassapput.
- Inuusuttut ulluni marlunni angusaqarluarnissaannik kissaappakka, ilinniartitaanermut suliffissaqarnermullu atatillugu pisariaqartitsinertik malillugu aaqqissuussaq qanoq tulluarsarneqarnissaa pillugu oqariartuutiminnik saqqummiinissaminnut periarfissinneqarmata, taanna oqarpoq.
Meeqqanut Inuusuttunullu Naalakkersuisoqarfik aamma Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfik pilersaarusiornermittaaq akuupput.