Suliniuteqartoq imminut toquttarnermut pinaveersaartitsinerminut MIO-mit nersornaaserneqartoq

- Artorsartilluni inummik tatigisinnaasamik oqaloqatigisinnaasamik nassaartoqartassaaq.

Lars Møllerip imminut toquttarnermik pinaveersaartitsiniarluni meeqqanut inuusuttunullu tamanna innersuutigisartagaasa ilagaat. MIO-p nersornaasiuttagaanik ataasinngornermi nersornaaserneqarnissani sioqqutilaarlugu Sermitsiaq.AG-mut taama oqarpoq.

- Imminut toquttarnerup oqaluuserinissaa nunatsinni suli paqumigineqarpoq, taamaattussaanngilarlu. Oqaluuserissavarput unitsinniarsaralugulu. Ikiuussinnaagama allat ikiorniassavakka.

Anaanaminit pingaarutilimmik siunnersorneqartoq

Lars Møllerip qaniginerpaasani imminut toqussimasut annaanikuuai. Ataataa ikinngutaalu arlallit imminut toqussimapput. Lars Møllerilu aliasunnermit eqqorneqarnermini piffissami artornartumi ilungersorluni qaqiuarpoq.

- Meeraagallarama anaanama aliasungaarluni oqarfigaanga tunniutinngisaannassasunga, aamma toqussagaluarpat. Taanna suli eqqaamavara, tamannalu allanut aliasuuteqartunut imaluunniit imminut toqunnissamik eqqarsaateqartunut ingerlateqqinniartarpara. Tunniutiinnartoqartassanngilaq.

Lars Møllerip imminut toqunnissamik pinaveersaartitsinermik suliaqarnera pissutigalugu MIO-p ukiumoortumik nersornaasiuttagaa Larsimut tunniunneqarpoq.

- Isumassinarsimaqaaq Lars Qamani-mi iluarsartuullugu pilersaarusiami suleqatigissallugu. Ersareqaaq, suliarujussuaq unissananilu qunusuilluni meeqqanut inuusuttunullu allatut nutaanerusumillu iliuuseqarusussusiata iluaqutaanera, meeqqat illersuisuat Aviâja Egede Lynge oqarpoq.

Ilinniarnertuunngorniarluni anaanani annaagaa

Anaanani imminut toquttoq annaagamiuk Lars ilinniarnertuunngorniarfimmi aallarteqqammerpoq. Ukiut pingasut qaangiummata ataatani aamma imminut toqummat annaavaa, aamma kammalaatai arlallit imminut toqussimapput.

Taamaattoq Lars Ilinniarnertuunngorniarfimmi ilinniarnini naammassivaa, eqqarsaatigisalerpaalu qanoq ililluni inunnut allanut ikiuisinnaanerluni. Lars ullumikkut 35-inik ukioqarpoq ilinniartitsisunngorniarlunilu ilinniarpoq. Katinnikuuvoq, sisamanik meeraqarpoq, Ilulissanilu najugaqarpoq, tassanilu imminut toquttarnermik pinaveersaartitsiniarluni annertuumik suliaqarpoq.

- Artornartut misigisimasakka oqaluttuaralugit inuit artornartunik oqaluttuarnissamik isumassarsiortinniartarpakka, uangalu oqaluttuareeraangama inuit oqaluttuarusulerlutik ammartartut misigisarpara.

Ukiumi 2022-mi MIO qanimut suleqatigisimavaa iluarsartuullugu pilersaarusiami Qamani`mi suleqataalluni, tassani inuusuttut imminut toqunissamik pinaveersaartitsinermi innersuussutigisinnaasatik sulissutigalugit. Tamakkua saniatigut Avannaata Kommuniani imminut toqunnissamik pinaveersaartitsinikkut iluarsartuullugit pilersaarusiat assigiinngitsut suleqataaffigai.

MIO-mit nersornaat isumaqartorujussuuvoq

- Allanik imminut toqunnermik annaasaqarsimasunik ikiuilluni sulinerup nanginnissaanut aamma imminut toquttarneq pillugu oqaluuserinninnermik ammaassinissamut nukissamik piumassutsimillu tunivaanga.

Ukiut tamaasa novemberip 20-ani Kalaallit Nunaanni meeqqat pisinnaatitaaffii pillugit sullissiviup MIO-p Naalagaaffiit Peqatigiit isumaqatigiissummik ulloritinneqartumit ullorsiortitsisarput, tamatumani MIO-p nersornaataa ukiumoortumik inummut peqatigiiffimmulluunniit tunniunneqartartoq iluatsillugu nalliuttorsiutigineqartarluni, taakkuummata meeqqanut immikkut ittumik iliuuseqarsimasut. MIO-p nersornaataa allagartamik check-imillu kr. 20.000 naleqartumik ilaqarpoq, taannalu Nuna-Fondimit aningaasalersorneqarpoq.

Imminut toqquttarnermik pinaveersaartitsinermut suliniummik nutaamik aallartitsiartorluni, Lars Mølleri pingasunngorpat Qaanaamut aallassaaq.