Sermersooq
Suliniutikkut meeqqat tamarmik timersornermut sunngiffeqarnermullu periarfissinneqassapput
Kommuneqarfik Sermersuup ilaqutariit, qitornamik sunngiffimmi sammisaqartinnissaannut akissaqanngitsut, tapiissuteqarfigai
Kommuneqarfik Sermersuumi meeqqat sunngiffimminni assigiissunik periarfissaqassapput.
Kommunalbestyrelsi aalajangerpoq sunngiffimmi pas-imik taaneqartoq eqqunniarlugu, taamaasilluni ilaasortaanermut akiliut kommunimit akilerneqassalluni.
Avataaniititsisoqassanngilaq
– Sunngiffimmi pas-ikkut qulakkeerneqassaaq meeqqat tamarmik sunngiffimmi soqutigisanik ingerlatsinissaminnut assigiissunik periarfissaqarnissaat, arlaannaannilluunniillu ataatsimooqatigiinnerup avataaniitsitsisoqannginnissaa. Sunngiffimmi sammisaqarneq meeqqat qanoq inuttut ineriartornissaannut pingaaruteqartorujussuuvoq, Sermersuumi Meeqqanut, Ilaqutariinnut Atuarfeqarnermullu Ataatsimiititaliami siulittaasoq Poul Hansen (D) oqarpoq.
Sermersuup paasissutissiissutigaa kikkut tapiiffigineqarnermik pisinnaanissaannut aalajangiisuussasoq inoqutigiit aningaasarsiaat ilaqutariinnilu meeqqat qanoq amerlatiginerat. Meeqqat tamarmik 500 koruunit angullugit ilaasortaanermut tapiiffigineqassapput. Ilaasortaanermut akiliut 500 koruunit inorpatigit meeraq sunngiffimmi sammisanik amerlanerusunik sammisaqarnissaminut periarfissaqassaaq.
Millionip affai
Meeqqat, sunngiffimmi pas-imik tunineqartut, sunngiffimmi sammisassamik ataasiinnarmik samminninnissaminnut killilerneqanngillat, ataatsikkulli klubbinut arlalinnut ilaasortanngorsinnaallutik.
Kommunimi sunngiffimmi siunnersortit meeqqanik ujarlissapput sunngiffimmi pas-imik iluaqutissinneqarsinnaasunik, atuarfiit, suliffeqarfiit kommunimilu Atugarissaarnermut, Sulisartoqarnermut Inuussutissarsiornermullu Ingerlatsivik aqqutigalugit.
Sunngiffimmi pas-inut ukiumut missingersuutinit 500.000 koruunit immikkoortinneqarsimapput. Naliliisoqarpoq taakkua naammassasut Kommuneqarfik Sermersuumi meeqqat 1.000-t aaqqissuussinermut peqataanissaannut.