sakkortusaavik tatineqarpoq
Sumiiffinni ukunani internet ajornerulissaaq
Tele-Postip atuisui pingaartumik nangeqattaartunik filminillu internet aqqutigalugu isiginnaarnerminni, assersuutigalugu Netflixikkoorlugu, ajornartoortarnissaat ilimagineqarpoq
2016-ip ingerlanerani sakkortusaaveqarfinni najugallit imaassinnaavoq internetimik atuinerminni ajornerusumik misigisaqartarsinnaasut.
Sakkortusaavik qanga datamik pisariaqartitsineq annikinneerarsuugallarmat sanaajusoq, Tele-Post tusagassiuutinut nalunaarummini allappoq.
Avannaani qummut killissaa tikinneqassasoq
- Taamaattumik piginnaasap qummut killissaa ukioq manna angusussaavarput – pingaartumik nunatta avannarpasinnersaani, nioqqutinut nittarsaassinermullu pisortaq Brian Smedemark nassuiaavoq.
Tassuma nassiuaatigaa, atuisut pingaartumik nangeqattaartunik filminillu internet aqqutigalugu isiginnaarnerminni, assersuutigalugu Netflixikkoorlugu, ajornartoortarnissaat ilimanartoq.
Avannaani kabelip immakkoortup aaqqissavaa
Kisianni akornutaasinnaasut minnerpaaffianiitinniarlugit Tele-Postimi teknikerit maanna sulipput.
- Sakkortusaaviup piginnaasaanik sullissisuusugut arlaliussinerput pissutigalugu ajornartorsiummik tamakkiivissumik qaangiiniarneq ajornakusoorpoq. Imaatigut kabeli avannaanukartoq ikkussorneqariarpat, ajornartorsiut qaangerumaarparput, Brian Smedemark nassuiaavoq.
Atuaruk: Immakkut attaveqqaat avannamut ilaneqalerpoq
Mobilinut akit nutaat
Taassuma saniatigut oqaatigaa, maannakkut sakkortusaavimmi internetimik nioqqutit pitsanngortinnissaat ajornartoq.
- Taamaattorli mobililinnut nuannersunik nutaarsiassaqarpoq, taanna erseqqissaavoq.
- Ukiamut mobililinnut attartornerit nutaat saqqummiunneqarnissaat sullitatta qilanaarisinnaavaat, taakkumi pitsaanerullutillu akinnerupput, Brian Smedemark oqarpoq.
Atuaruk: Ole Dorph: Immap naqqatigut kabelilerneqassaagut