pilluaritsi
Tapersersortinut nutaanut pilluaqqusineq
Tapersersortit nutaat pilluaqquneqarput. - Inunnut tarnikkut napparsimasunut ilaqutaasunut nipaatsumik maluginiarneqartanngitsunullu aamma attortiasuusunut atugarliuuteqartartunullu attaveqaataasussaapput.
Innarluutillit Illersuisuat Tilioq aamma Inuit Pisinnaatitaaffiinut Kalaallit Nunaata Siunnersuisoqatigiivi Nunatsinni siullersaallutik tapersortinngortut arfinillit pilluaqquavaat.
- Nuannaarutigalugu Sermitsiaq.AG-kkut takuarput Peqqissanermik Ilinniarfik tapersersuisunik nutaanik tallimanik (arfinillit aaqq.) ilinniakkamik naammaassisitsisimasoq, Innarluutillit Illersuisuat Christina Johnsen aamma Inuit Pisinnaatitaaffiinut Kalaallit Nunaata Siunnersuisoqatigiivinut siullittaasoq, Carl Chr. Olsen, tusagassiuutinut nalunaarummi allapput.
Ilaquttat attaveqaatillu nipaatsumik maluginiarneqarneq ajortut
Tapersersortit nutaat arfinillit ukioq ataaseq affarlu ilinniareerlutik ippassaq sisamanngornermi persuarsiornertalimmik ilinniagaqarsimanermut uppernarsaat tiguaat.
- Pineqarpoq ilinniagaq nutaarluinnaq amigaataasarsimsoq naammassinerup kingorna suliassatigut pingaaruteqalersussaq, Christina Johnsen aamma Carl Chr. Olsen allapput.
Inunnut tarnikkut napparsimasunut ilaqutaasunut nipaatsumik maluginiarneqartanngitsunullu aamma attortiasuusunut atugarliuuteqartartunullu attaveqaataasussaapput.
- Taamaattumik nuannaarutissaavoq ilinniagaq taanna nutaaq inunnut tarnikkut nappaateqartunut sammititaammat, ilaanni tarnikkut nappaatilinnut qanigisatut ilaqutaalluni tamaviaarnarsinnaammat, taakku allapput.
Aamma atuaruk: Ulloq immikkuullarissoq: Tapersersortinngortut siulliit allagartartaartut
Ilinniagaq qanigisaasut peqatigiiffianit tapersersorneqartoq
Tapersersortitut ilinniagaq napparsimasunut angerlaarsimaffimmi najugaqarsinnaasunut naleqqussarneqarsimavoq. Tapersersortip napparsimasup imminut ikiornerulernissaanik, eqqiaanermik eqqiluisaarnermillu ikiorsinnaavaa. Aammalu ilinniagaqalernissaanik suliffittaarniarneraniluunniit aamma ikiorsinnaallugu.
Taamaattumik tarnimikkut nappaatilinnut qanigisaasut peqatigiiffiata – Sugisaq – innarluutilinnut tapersersortissanik ilinniakkamik pilersitsisoqarsimanera nuannaarutigaa.
- Tarnikkut innarluutilinnut suliaqartut ilinniartinneqarnissaat assut pisariaqartinneqarpoq. Taamaammat tarnikkut innarluutilinnut ilinniagaqartut tamaasa tapersersortarpagut, Sugisami siulittaasoq, Ezikias Therkelsen Sermitsiaq.Ag-mut oqarpoq.