Timmiarsiuut tupigusoqaat: Tulugatsiaq Svalbardimut mippoq

Norskit timmiarsiuut uissuumminartorujussuartut oqaatigaat. Aatsaavissuaq siullermeersumik tulugatsiaq nalinginnaalluinnartoq norskit qeqertaataanni Svaldbardimi, nanorpassuaqarfittut ilisimaneqarnerusumi, takuneqarsimavoq.

– Tulugatsiap Svalbardimi takuneqarnera timmiarsiuut oqaatigaat tupaallannadrluinnartutut, Statens Naturoppsyn-imeersoq seniorrådgiver Georg Bangjord Svalbarposten-imut oqarpoq.

Tulugatsiaq latinerisut atilik pica pica timmissat artit qeqertani nalunaarsorneqarsimasut 213-issaraat, nunarsuarmilu silap pissusiata allanngoriartornera pissutigalugu uumasut artit amerligaluttuinnartut Svalbardimut pisalerput, qeqertallu Kalaallit Nunaata qeqqatut avannarpasitsigisumiipput.

Ukiut marluk matuma siornatigut Svalbardip imartaani qaqutigoortumik avaleraasartoortoqarpoq, kingullermillu ilisimatuut tupassutigaat uillut taama avannarpasitsigisumut pisalersimammata.

Aviisi Aftenposten naapertorlugu tulugatsiaq qeqertami Bjørnya-mi, qeqertami kujasinnerpaamiittumi, silasiorfiup silataanut missimavoq. Timmiaaqqanik nerliisarfimmi ungasinngitsuani mitsimavoq musvitti, taannalu aamma ukiut pingasut matuma siorna tikillugu tamaani takuneqartarsimanngilaq.

Timmiarsiuulli naliliipput tulugatsiaq ´nunassivikkunanngitsoq´.

- Ilimananngilaq. Tulugatsiaq tulugaqataalu allat orpinni angisuunik ulluliortarput avalequterpassuillu atorfissaqartittarlugit. Bjørnøya-mi Svalbardimilu tamarmi tamakkoqanngilaq, Svienn Are Hanssen Aftenposten-imut oqarpoq.

Norskit timmiarsiuut ersissutigaat nattorallit, Norgep sineriaani amerlasuunngorlutik piaqqiortartut, Svalbardimut takkunnissaat. Ullumikkut qeqertani ataasiinnarmik qaasuttumik timmiaqarpoq - tassalu polarmåge.

– Norgep sineriaani nattorallit amerliartupiloorput. Timmiaqarfiit akornusersorpaat, timmissat ivasut ersiortillugit qimaatittarlugit, timmissat qaasuttut mikinerusut manniinik piaraannillu nerisinnaanngorlugit. Svalbardimut pissaguni ajoqusiisorujussuussaaq, Sveinn Are Hanssen oqarpoq.