silarluk
Timmisartuussinerpassuit taamaatipput
Air Greenland marlunngornermi ataasiakkaaginnarni timmisartuussissaaq
Air Greenland maanna nalunaarpoq timmisartuussinerit amerlanersaat marlunngornermi taamaatinneqartut kitaani silarluppallaarnera pissutigalugu. Avannaani kujataanilu timmisartuussinerit ikittuinnaat pissapput.
Ilaasorpassuit ingerlariaqqinnaveertut marlunngornermi aamma ingerlariaqqissanngillat. Timmisartorsuaq Norsaq Kangerlussuarmut tikereerpoq aatsaallu pingasunngornermi uteriassaaq ataasinngornermi marlunngornermilu kinguaattoortorpassuit ilaanissamut periarfissinniarlugit.
- Naak sila pingasunngornermi pitsanngoriangaatsiassagaluartoq timmisartuusinnaasullu tamaasa atorlugit timmisartuussisoqaraluartoq ullut marluk pingasut atorlugit kinguaattoortorpassuit apuunniarneqassapput, Air Greenland marlunngornermi ualikkut nalunaarpoq.
Air Greenlandip timmisartuussinernut pilersaarusiorfia tamassa ulappuseruttorpoq pingasunngornermi Nunatsinni timmisartuussinissat piareersarlugit aammalu sapinngisamik piaartumik ilaasorpassuit apuunniarlugit.