Tivoli iluatsilluarpoq
Nuummi ulluni pingasuni Tivoleqarnerani aningaasat 1,4 millioner koruunit missaanniittut kaaviiaartinneqarput.
Københavnimi Tivolimit qummoroortartartup Nuummi tivoli naggaserluarpaa, tivolilu ilaqutariippassuarnit ornigarneqarsimavoq, pisarneq malillugu arsaattarfimmut inissinneqarsimasoq.
– Angusavut naammagisimaartorujussuuvagut. Nuanniilaarporli sapaatiummat karruseli aserorpat, tivolilu naammassingajalermat unitsiinnarsimavarput. Karruseli maanna annertunerusumik iluarsaanneqassaaq, Sct. Georgs Gildetimi skatmester Sanne Mikkelsen Sermitsiaq.gl-imut oqarpoq.
Tivolimit sinneqartoorutit ilaat ajunngitsuilornermik siunertanut atorneqassapput, ilaallu ingerlatsinermut atorneqassallutik.
– Ukioq naallugu tapiiffigineqarnissamik qinnuteqartoqarsinnaavoq qinnuteqaatillu ataavartumik suliarisarpavut. Suliniummi siunertarineqassapput meeqqat, inuusuttut utoqqaallu, Sanne Mikkelsen oqarpoq.
Sapaatiummat unnukkut qulit missaani inuppassuit takkussuupput, tivoli qummoroortarnersuarmik naggaserneqarmat. Nuummi tivoli 27-issaa ingerlanneqarpoq.