kisitsisit
Tunisat pisallu oqimaaqatigiissaarnerat aallartinnerliortoq
Avammut tunisinermit millionit ikinneruleriartorput, tamatumalu saniatigut nunanit allanit eqqussuineruleriartorpugut. Aningaasaqarnikkut taamatut ineriartornerup tunisat pisiallu oqimaaqatigiissaarnerannik tatisimannippoq.
Kvartalimi siullermi avammut tunisineq siornamut sanilliullugu 25 millionit koruuninik ikileriaateqarsimasoq, Naatsorsueqqissartarfimmit kisitsisit nutaat takutippaat, nioqqutissallu eqqussorneqartut 20 millionit koruuninik amerleriaateqarsimallutik.
46 millionit koruuninik ajorseriartoqartoq
Kvartalimi siullermi tunisat pisiallu oqimaaqatigiissaarneranni amigartoorutit 134 millionit koruuniupput, tamannalu ukiumut siulianut sanilliullugu 46 millionit koruuninik ajorseriarneruvoq.
Inuiaqatigiit aningaasaqarneranni kisitsisip pitsaanngitsut nassuiaatissartaasa ilagaat, raajat aamma qalerallit avammut tunineqarnerisa nalingi ukiup qaammataani siullermi 64 aamma 48 millioninik appariarsimanerat. Tamanna imartat sikoqarneranik ilaatigut pissuteqarpoq, ukiullu qaammataani siullerni aalisartut unammillernartumik atugaqarput.
Angallatit eqqussorneqartut amerleriartut
Eqqussuinermut tunngatillugu ''maskiinat aamma angallatit'' ingammik tunisat pisiallu oqimaaqatigiissaarnerannik artukkiisuupput. Taakkunani ukiup siulianut sanilliullugu qaffariaataasoq 7,8 procentiuvoq.