suliniut
Tunumut atisanik atornikunik karsinik 35-nik katersisimasoq
Nuummi meeqqat atisaanik Vera Egede katersaqarpoq. Taakku Kuummiunut, Tasiilamut Kulusummullu nassiunneqassapput
- Panimma atisai siullermik katersorlugit aallartippakka, puussiat arlariit tassani katersoqqaarlugit, Vera Egede oqaluttuarpoq.
Air Greenlandimi saqisutut sulisuuvoq, arlaleriarluni Tunuliartarluni.
Taamatut aallartereerami kiisa suliaa annertunerulerpoq, tassami nalunngisaasa aamma atisat atornikuusaat tunniuttalerpaat.
Suleqateqartoq
- Ataasiarlunga puussiat nassatassakka puiortoorpakka. Aqqutaani Justus Hansen (D) angalavoq, qanorlu atorfissaqartitsisoqartiginersoq oqaloqatigilerlugu. Justus Hansenip kikkut saaffigissanerikka innersuuppaanga, oqarpoq.
Tassanngaannit attaveqaatissaminut saaffiginnippoq.
Katersineq taamaatinneqartariaqartoq
- Kulusummukaleraangama atisanik nassataqartarpunga, kisianni piffissami ataatsimi atisarpassuarnik nassataqartalerpunga, ilaallu nassiusserusukkaluit itigartittariaqartarsimallugit, Vera Egede oqarpoq.
Vera Egede karsinik 35-nik Tunuliaassassanik piareersimasuuteqarpoq.
Suliffeqarfimmik aamma suleqateqalersimavoq.
Umiarsuarmik timmisartumillu
Atornikoorniarfimmut Amarngivatimut Tasiilamiittumut nassiunneqassapput, aamma taanna Kuummiuni Kulusummilu immikkoortortaqarfeqarpoq. Umiarsuakkut timmisartukkullu ingerlanneqassasut Vera Egede Sermitsiaq.AG-mut oqarpoq.
- RAL aqqutigalugu assartuunneqassappata atisat apriilimi aatsaat anngutissapput. Sukkanerusumik ingerlanneqarnissaat sulissutigissavara, oqarpoq. Qaanaamut aamma assinganik suliaqalernissani pilersaarutigaa.
- Piviusunngussanersoq piffissap takutikkumaarpaa. Allat aamma assingusumik suliaqalernissaannik takorluuilersitsisimassasoq neriuutigaara, oqarpoq.
Atisat nassiunneqartussat assimi ataani takukkit