Tusaannga: Imminut toqunnissamik eqqarsaatit pissutigalugit meeqqat inuusuttullu ikiortissarsiortarput
Eqqarsaatit imminut toqunnissamik taartunik ulikkaaraangata meeqqat inuusuttullu Tusaanngamut attaveqartarput. Tamanna Tusaanngap ukiumoortumik nalunaarusiaani atuarneqarsinnaavoq, nalunaarusiaq imminut toquttarnerup pinaveersaartinnisaanut nunat tamalaat ullorititaanni tamanut saqqummiunneqarpoq.
2020-mi meeqqat inuusuttullu 13-it imminut toqunnissamik eqqarsaateqarnertik pissutigalugu Tusaanngap siunnersuisuisa ilaannut sianersimapput. Meeqqat inuusuttullu erloqinartunik eqqarsaateqarnertik inuunerminnilu ajornartorsiuteqarnertik pillugit ikiortissarsiorlutik sianertanerannut imminut toqunnissamik eqqarsaateqartarneq pissutaanerpaasunut pingasunut ilaavoq.
Naalakkersuisut tusagassiorfinnut nalunaaruteqarlutik taamatut allapput.
- Meeraq, inuusuttoq inersimasorluunniit imminut toqunnissamik eqqarsaateqarpat kiserliornermik neriuutaarunnermillu misigigajuttarpoq. Ikinngutinit, ilaquttanit inuiaqatigiinniillu mattuteratarsinnaapput - inunnit ikiuisinnaasunit ungasissorujussuanngorlutik.
Tusaannga
Imminut toqunnissamik eqqarsaateqaraanni imaluunniit kiserliorluni misigisimagaanni Tusaannga 801180-imut sinaerfigineqarsinnaavoq imaluunniit 1899-imut sms-erfigineqarsinnaavoq, tassa kinaassutsimik isertuilluni akeqanngitsumillu siunnersortit oqaloqatigineqarsinnaallutik.
Tusaannga ammasarpoq:
Ataasinngorneq-sisamanngorneq nal. 9.00-22.00
Tallimanngorneq nal. 9.00-04.00
Arfininngorneq nal. 16.00-04.00
Sapaat nal. 16.00-22.00
Imminut toqunnissamik eqqarsaateqarneq kiserliornerlu pissutaanerpaasut ilagisarpat, meeqqat inersimasullu ilungersunartorsiornerminni Tusaanngami siunnersortinit ikiorneqarnissartik anguniarlugu sianertarnerannut.
Nakuusernerit kinguaassiuutitigulluunniit kannguttaatsuliornerit
Tusaanngap ukiumoortumik nalunaarusiaani aamma atuarneqarsinnaavoq, meeqqat inuusuttullu inuit allat ajornartorsiuteqarnerminnut toqqaannartumik pissutaagaangata Tusaanngamut attaveqannginnerusartut.
- Meeqqat inuusuttullu nakuusernermik kinguaassiutitigullu kannguttaatsuliorfigineqarnermik misigisatik pissutigalugit ikiortissarsiorlutik sianertarnerat kiserliornermik imminut toqunnissamilluunniit eqqarsaatinik misigisaqarlutik ikiortissarsiortarnerannit ikinnerupput, Naalakkersuisut ilisimatitsipput.
Inersimasut Tusaanngamik atuisuusut
Nalunaarusiami aamma atuarneqarsinnaavoq, inersimasut oqarasuaatikkut siunnersuisarfimmik atuisuunerusartut. Taamaammat meeqqat, inuusuttut inersimasullu immikkut qanoq pisariaqartitsinersut misissorneqarniarpoq.
- Meeqqat inuusuttullu pisariaqartitaannik toqqissisimanermik ikiorneqarnissamillu pilersitsinissaq siunertaralugu Tusaanngap digitalimik attavigineqarsinnaalernissaanut Naalakkersuisut 2022-mut aningaasanut inatsisissamut sinnersuummi amerlanerusunik tapiiffigineqarnissamik taamaammat qinnuteqarput. Tamatuma saniatigut meeqqat, inuusuttut inersimasullu pisariaqartitsinerat eqqorlugu ajornannginnerusumik ikiortissarsisoqarsinnaassaaq. Aningaasaliineruneq Tusaanngamik nittarsaassinermut ammasarfiillu sivitsornerannut atorneqassaaq, Naalakkersuisut tusagassiorfinnut nalunaaruteqarlutik allapput.
Tusaannga Facebook-imi nassaassaareerpoq, tassani siunnersorneqartarneq pillugu paasisaqarnerusinnaavutit.