assit takukkit
Ukioq manna Narsami arnatsialak
Arfininngornermi unnukkut katersortarfimmi arnat ullorsiortinneqarput, Narsamilu ukiup arnatsialaa toqqarneqarpoq
Arnat eqimattat Theo Kruse, Kattie Nielsen aamma Avaaraq Olsen, katersortarfimmi arnat unnussiuaarnerannik aaqqissuisuupput, illoqarfiup peqatigiiffii arnat ulluannik malunnartitsisimannginnerat pissutigalugu.
Arnat 50-t missaaniittut aaqqissuussinermut takkupput, nuannersumillu unnussiuaarput, kaffisorlutik, kaagisorlutik, erinarsoqatigiillutik aamma assigiinngitsunik aliikkusersorlutik.
Arnat unnussiorfiat
Arnat ilaasa assassukkatik takutippaat, Susanne Kielsenip kalaallisuuliortarneq oqaluttuaraa, tamanna inuusuttuulluni anaanamini ilikkarsimavaa.
Arnat gruppiat nutaaq pilersinneqaqqammersoq, meeqqanik atornerluineq pillugu ajornartorsiutinik suliaqartut ataatsip oqaluttuaraa.
Aamma arnat pingasut pinnersarneqarnissaminnut neqeroorfigineqarlutik toqqarneqarput, taakku nujaleritillutillu pinnersarneqarput.
Tallimat toqqarneqartut
Naggataatigut Narsami ukiup arnatsialaat toqqarneqarput, ukioq manna taakku tallimaapput.
Tupârnak Edvardtsen, uillarneq 70-t sinnerlugit ukiulik, siornatigut Igalikumi najugaqarsimasoq, nuannaartuaannarmat aamma allanut ikiuukkumatummat toqqarneqarpoq.
Sarah Rødgaard, Narsap Atuarfiani pisortap tullia, atuarfik sanaartorfiugaluaqisoq, atuartunik illoqarfimmi utaqqiisaasumik atuarfeqartitsigaluartoq ajunngitsumik ingerlatitsinera pissutigalugu toqqarneqarpoq.
Grethe Poulsen aamma Sara Nielsen immikkut atuartitaakkanut qulingiluat 13-illu akornanni ukiulinnut ilinniartitsisut, siorna ukiakkut meeqqat pisinnaatitaaffii pillugit MIO-p titartaalluni unammisitsineranut ajugaasut. Taakku titartagaasa ilaat ullorsiutini naqinneqassapput.
Aaqqissuisuusartoq
Kiisalu kommunalbestyrelsemi ilaasortaq Avaaraq Olsen (IA) toqqarneqarpoq, timersornernik aaqqissuisuusarnini pissutigalugu, ingammik inuusuttunut. Taanna arnani toqqarneqartuni katersortarfimmi aaqqissuussinermut kisimi takkuppoq.
Illoqarfiup arnartaat Narsami arnatsialannut innersuussisinnaasimapput, innersuunneqartunilu toqqarneqarnerpaat ilanngunneqartarput.
Atuaruk: Narsami arnat kalaallisuut sammivaat
Uani ataani assit takukkit