Ukkusissami nakkartoqartoq: Angut pinartoqarsimatillugu nakorsiartarfiliaanneqarpoq
Inuit sisamat Nuummi Ukkusissamut ataasinngornermi ualikkut pisuttuartillutik ajutoortoqarpoq. Angut qaqqami pisuttuartillutik quaalluni nakkarpoq, tuimigullu annersimagami ammukarnermi ikiorneqartariaqarluni. Angut kingorna pinartoqarsimatillugu nakorsiartarfiliaanneqarpoq.
Inuit sisamat Ukkusissamut ataasinngornermi 6. marts ualikkut pisuttuartillugit, angut ataaseq quaalluni nakkarpoq. Kingorna pinartoqarsimatillugu nakorsiartarfiliaanneqartariaqalerluni.
Angut Ukkusissami quaalluni nakkarnerminit tuimigut ajoquserpoq, ammukarnissamullu ikiortariaqalerluni. Kalaallit Nunaata Politiivisa ajutoortoqarneranik nalunaarut ataasinngornermi ualikkut nalunaaqutaq tallimat qiteqqunnerata nalaani pivaat. Politiit ilisimatitsipput angut portunngitsumit nakkartoq, nakkarnerminili ajoqusersimasoq.
- Inuit sisamat politiinut attaveqarnerminni paasiniaapput ammukarnermi ikiorneqarsinnaanerlutik, ilartik ajoqusersimanera pissutigalugu. Oqartussalli, soorlu qatserisartut, aqqutit taamaatsillugit imaaliallaannaq ikiuukkiartorlutik majuarsinnaasanngillat, politiini pigaartut pisortaat Palle Augustinussen Sermitsiaq.AG-mut oqarpoq.
Mianersortoqarnissaa kaammattuutigigaat
Politiini pigaartut pisortaat ilisimatitsivoq pisuttuartut namminneerlutik ammukarsinnaasimasut. Ukkusissamit ammukareernermi akornusersimasoq pinasuartumik napparsimaviliaanneqarpoq.
Nuummi ullut kingulliit kiannerusimammat nuna quasangaatsiarpoq. Issileriartoqqilermallu quatserfiit arlaqarmata, pinngortitamut pisuttuartut mianersornissaannik politiit kaammattuuteqarput.
- Ukkusissamut pisuttuarnissaq massakkorpiaq immaqa isumatusaarneruallaanngilaq. Pinngortitami pisuttuartut mianersornissaat kaammattuutigaarput, aqqutit quasassinnaammata, pigaartut pisortaat oqarpoq.
DMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...