medier
Unammillertumik peqatigiiffiliorput
Illoqarfiit radioqarfiisa tv-qarfiisalu peqatigiiffiat STTK unammillertitaarpoq. Peqatigiiffik nutaaq sisamanngornermi unnukkut pilersinneqarpoq
STTK-mi ataatsimeersuarnermit ulloq ataaseq qaangiutiinnartoq tv-qarfiit radio-qarfiillu arlallit ataatsimoorlutik nutaamik peqatigiiffiliorput. Nuuk TV-meersoq Peter Frederik Lyberth peqatigiiffittaami ’Nunatsinni tusagassiutilerisut kattuffiat’-nni siulittaasunngorpoq.
STTK-p ingerlanneqarnera naammagiunnaarlugu Nuuk TV aamma Ilulissani Arctic TV peqatigiiffiliorniarlutik suliniuteqalersuupput. Peqatigiiffillu nutaaq ’Nunatsinni tusagassiutilerisut kattuffiat’ pilersillugu sisamanngornermi unnukkut ataatsimeersuartoqarmat peqatigiiffiit arfineq pingasut ilaasortanngorput.
Peqatigiiffik maanna illoqarfinni radioqarfinnut tv-qarfinnullu ikorfartuutaaniarpoq. Peter Frederik Lyberth Nuuk TV-meersoq siulittaasutut qinigaavoq Kristoffer Mathæussen Arctic TV-miit aamma Claus Nissen Nuummi illoqarfiup radiortaavanit Voice of Greenlandimit siulersuisuni ilaasortaalerput.