Unammisartut tupassimaqqapput: Holdimi katsorsarneq imminornerluunniit
Ilulissani klubbimi Nagdlunguak 1948-mi inuusuttunut assammik arsartartunut immikkut ittumik iliuuseqartoqartariaqarsimavoq, ukiup affaata ingerlanerani unammisartut pingasut imminut toqunnerisa kingorna.
- Tamatuma oqaloqatigiissutiginissaa atorfissaqartipparput. Tassami imminut toquttarneq inuiaqatigiinni ajornartorsiutaasorujussuuvoq.
Taamatut isumaliutersorpoq assammik arsartartut klubbianni Nagdlunguaq 1948-mi, imaluunniit ulluinnarni N-48-mi, siulersuisuni siulittaasoq Lena Ravn Davidsen.
Imminut toqunnermut atatillugu imminut ammarnissaq psykoterapeutimillu oqaloqateqarnissaq ukioq manna pisariaqarsimavoq, Ilulissani klubbimi unammisartut pingasut imminut toqunnerat pissutigalugu.
Ataatsimoorluni katsorsaaneq
Pisoq siulleq pivoq coronap ajornartorsiutaanera aallartittoq, marsip-apriilip missaani, Lena Ravn Davidsen oqaluttuarpoq.
- Tamanna nammineerluta iliuuseqarfiginiarsimavarput, unammisartut katersortillugit, oqaloqatigiilluta ataatsimoorlutalu ilisiartoqataalluta, taanna oqarpoq.
Imminut toqunneq tulleq pivoq aasap ingerlanerani. Taanna ullumikkut unammisartooqataasimanngilaq, siusinnerusukkulli assammik arsartartuusimalluni, suli holdimut attuumassuteqarsimasoq kammalaataasimasorlu. Tassunga atatillugu kingorna iluamik iliuuseqartoqarsimanngilaq, Lena Ravn Davidsen oqarpoq.
Isumaqatigiissutigineqarpoq holdi ataatsimoortillugu katsorsaasoqassasoq, ataasiakkaanillu kissaatigineqarpat aamma kisimiilluni oqaloqatiginninnissamut periarfissaqarpoq.
Allaaserineqartoq aviisimi AG-mi tamakkiisumik atuaruk. Aviisi uani pisiarineqarsinnaavoq: