Upernaviup innaallagissiorfia imeqarfialu sanaqqinneqalerpoq
Nukissiorfiit Upernavimmi innaallagissiorfianik imeqarfianillu sanasoqaqqinnissaa akuersissutigineqartoq, nukissiornermik ingerlatsivik ilisimatitsivoq
Nukissiorfiit Upernavimmi innaallagissiorfiat imeqarfiallu maajimi 2009 nunguilluni ikuallattoq kiisami sanaqqinneqarsinnaalersoq nukissiuteqarnermik ingerlatsivik nalunaarpoq, sanaartorneq ukioq manna aallartissaaq aappaagu naammassineqarluni.
Siusinnerusukkut Nukissiorfiit – iluatsinngitsumik – sanaartornissaq suliariumannittussarsiorsimavaa. Maannakkut innaallagissiorfiup imeqarfiullu sanaqqinneqarnissaa suliassanut annikinnerusunut pingasunut avinneqarpoq. Ilaatigut tamatuma kinguneraa sumiiffimmi entreprenørinut suliniummut neqerooruteqarnissap ajornannginnerulernera.
Nukissiorfiup sanaqqinneqarnissaa immikkoortiterneqarpoq ukununnga imeq, innaallagiaq aamma illup sanaartorneranik suliassaq. Nukissiorfiit sanaartortitsisutut suli inississimavoq aamma taamatuttaaq suliassat immikkuualuttortaannut pilersaarusiortuussaaq.
Aaqqiineq ajunngitsoq
Upernaviup innaallagissiorfia imeqarfiutigisoq maajimi 2009-mi ikuallappoq kiisalu ajutoornerup nalilersorneqarnerata naammassinerata kingorna suliniut 2012-imi tamakkerlugu suliariumannittussarsiuunneqarpoq. Taamaattorli suliniummut neqerooruteqartitsineq iluatsinngilaq, tassa suliniummut akigitinneqartussatut naatsorsuutigisamut naleqqiussilluni, taamaattumik suliariumannittussarsiuussineq taamaatinneqarpoq.
Tamatuma kingornatigut Nukissiorfiit aamma sillimmasiisarfik isumaqatigiinniarput aaqqiinissaq atorneqarsinnaanerusoq anguniarlugu, tassani aammattaaq periarfissiissutigineqarluni entreprenørit mikinerusut sanaqqinnermut atatillugu suliassaqarnissaat.
- Nukissiorfinnit kissaatigineqarpoq Upernavimmi innaallagissiorfiup / imeqarfiup sanaqqinneqarnera piaarnerpaamik aallartinneqarnissaa, aamma Qaasuitsup Kommuniata ilalerpaa suliassap suliarineqarnissaata pilertortumik pinissaa, tassa Upernavimmi sanaartornissamut akuersissuteqarnissamut atatillugu. Taamaattumik maanakkut periarfissaalerpoq sanaartornerup 2013-imi aallartinneqarsinnaanera, Nukissiorfiit tusagassiivinnut nalunaarput.