Upernaviup peqqissaaviani tunillatsissimasut arlallit
Upernaviup peqqissaaviani uninngasut arlallit Covid-19-imik tunillatsissimasut paasineqarpoq. Peqqissaavik susassaqanngitsunut matuneqarallarpoq.
Upernaviup peqqissaaviani uninngasoq ataaseq Covid-19-imik tunillatsissimasutut paasineqarsimasoq ullumi nalunaarutigineqarpoq. Ullumili misissuinerit takutippaat uninngasut arlallit aamma tunillatsissimasut, oqartussat nalunaaruteqarput.
Tunillaassuuttoqalinnginnissaa pillugu peqqissaavik matuneqarallarpoq, pisariaqavittumillu nakorsarneqarsinnaasunut taamaallaat ammatinneqassalluni.
Namminersorlutik Oqartussat taama tusagassiorfinnut nalunaaruteqarput.
- Upernavimmi peqqissaavimmi napparsimasut uninngasut arlallit Covid-19-imik tunillatsissimasut paasineqarpoq. Tuniluunneq suminngaanneersimanersoq paasiniarneqaleruttorpoq, namminersorlutik oqartussat allapput.
Napparsimasut piaartumik ikiorserneqartariaqartut oqarasuaatikkut saaffiginnittariaqarput pisariaqarpallu napparsimmavimmut isertinneqarsinnaallutik.
Misissortinnissamut kaammattuisut
Oqartussat ilisimanngikkallarpaat tuniluunneq sumit aallartissimassanersoq. Upernavimmi innuttaasut Covid-19-imik tunillatsissimanermut ersiuteqartut taamaammat misissortinnissaannik kaammattorneqarput.
- Inuit Upernavimmiittut COVID-19-imut ersiuteqarunik peqqissaavimmut saaffiginneqqullugit kaammattorneqarput, namminersorlutik oqartussat ilisimatitsipput.