Urani pillugu isumasiuineq
Urani pillugu taasisitsisoqarnissaa innuttaasut amerlanerussuteqartut kissatigaat
Isumasiuinerulli takutippaa uranimik piiaanertalimmik aatsitassarsiornissaq amerlanerussuteqartut isumaqatigigaat
Nunatsinni innuttaasut 62 procentii isumaqarput urani pillugu innuttaasunik taasisitsisoqartariaqartoq, 38 procentiilu tamatumunnga akerliupput.
Nunatsinnili uranimik piiaanertalimmik aatsitassarsiortoqarnissaa innuttaasut kissaatigineraannut apeqqummut kisitsisit allaanerupput. Isumasiuinermi peqataasut 54 procentiisa uranimik piiaanissaq taperserpaat, 46 procentiisalu akerleralugu.
Tamanna takuneqarsinnaavoq WWF Verdensnaturfonden sinnerlugu HS Analysep isumasiuinerani nutaami.
Peqataasunut apeqqutit
Isumasiuinermi inuit 722-lt peqataapput, imatullu aperineqarput: ´Urani pillugu Kalaallit Nunaanni innuttaasunik taasisitsisoqarnissaa isumaqatigaajuk akerleraajulluunniit?´ kiisalu ´Uranimik piiaanertalimmik aatsitassarsiornissaq isumaqatigaajuk akerleraajulluunniit?´
WWF Verdensnaturfondenimi generalsekretær Gitte Seeberg oqarpoq misissuinerup takutikkaa kalaallit innuttaasut tusaaneqarnissartik kissaatitigaat.
– Tamanna suli angumerineqarsinnaavoq. WWF-imit kajumissaarutigiinnarsinnaavarput tunngaviusumik pingaarutilmmik aalajangiinerit pisassasut tunngavissaqarluarluni kalaallillu innuttaasut tunuliaqutaralugit, taanna tusagassiorfinnut nalunaarutikkut oqarpoq.
Inuusuttut akerliupput
Isumasiuinerup takutippaa angutit 57 procentiisa uranimik piiaanissaq kissaatigigaat, arnani amerlanerussuteqartut, 53 procentit uranimik piiaanissaq akerlerigaat.
Inuusuttulli amerlanerussuteqarluartut uranimik piiaanissaq akerleraat. 18-iniit 29-nut ukiulinni 60 procentit uranimik piiaanissaq akerleraat 40 procentillu tamanna kissaatigalugu.
Generalsekretær Gitte Seeberg oqarpoq kinguaariit inuusuttut ersarissumik uranimut naaggaartut.
– Tamakkuami aalajangiinerup siunissami kinguneqaatissaat maluginerpaasussaavaat, taanna erseqqissaavoq.
WWF: Naalakkersuisut ersissutissaqanngillat
Isumasiuinerup takutimmagu uranimik piiaanissaq amerlanerussuteqartut tapersersoraat, Gitte Seeberg isumaqarpoq urani pillugu innuttaasunik taasisitsisoqassappat Naalakkersuisut ersissutissaqanngitsut.
– Isumasiuineq eqquutissappat innuttaasunik taasisitsisoqarnerani naalakkersuisoqatigiit ersissutissaqanngillat, WWF-ip generalsekretæria oqarpoq.
Isumasiuinermi nutaami inuit 722-t nunamit tamarmeersut telefonikkut apersorneqarput.
Isumasiuinerup inernera tamaat allaaserisap talerpia'tungaani filimi ilanngunneqartumi takusinnaavat