Utoqqaat akerliuniarput
Nuummi utoqqalinersiutillit Inatsisartut aprilip 17-ianni upernaakkut ataatsimiilerpata inuuniarnerminni atukkamik pitsaanerunissaat pillugu akerliussutsiminnik takutitsilersaarput.
Utoqqaat peqatigiiffianni siulittaasoq Ole Magnussen taama ilimasaarivoq.
Utoqqalinersiallit kommunit januarimi kattussornissaannut atatillugu atukkamik pitsaannginnerulernissaat kamaatigaat.
Kommuneqarfik Sermersooq kamaatinngilaat, kisiannili Inatsisartut siusinaartumik utoqqalinersiaqalersartut utoqqalinersisartullu atugassaat pillugit peqqussutinik akuersissutiginnittartuusut.
– Taamaattumillu Inatsisartut kisimik peqqussutinik allannguisinnaapput, Ole Magnussen oqarpoq.
Ivittuut, Paamiut, Nuup, Ammassallip Ittoqqortoormiillu kommunii ukiortaamiit kattuppata Nuummi utoqqalinersisartut ilaat eqqugaassapput.
Kommuneqarfik Sermersuumi innuttaasut tamarmik assigiimmik pineqartussaapput, utoqqalinersisartullu atugaannik misissuinikkut paasineqarsimavoq kommunini taakkunani tallimani utoqqalinersialinnut atugassarititaasut assigiinngiiaartorujussuusut.
Tassani pineqarlutik immikkut tapisiat inuttullu tapisiat. Tassalu aningaasat, utoqqalinersisartut akiligassatik aalajangersimasut akilereeraangamikkit inuuniutissarilersagaat.
Tapisiat tamakku utoqqalinersiallit ataasiakkaat aningaasaqarnikkut atugaat misissoqqissaarneqareeraangata annertussusilerneqartarput.
Nuummi kommunalbestyrelsi tunngaviusunik annertussusiliisimavoq. Siusinaartumik pisartagalinnut: Kisimiittunut 5.000 kronit aappariinnullu 8.000 kronit.
Utoqqalinersialinnut: Kisimiittunut 6.000 kronit aappariinnullu 9.000 kronit.
Kommunilli aamma 1994-imiilli (kommunip nammineq nalunaaruteqarneratut 1984-imiunngitsoq, aaqq.) utoqqalinersiallit isumamineersumik ineqarnermut tapiiffigisalersimavai.
Utoqqalinersiallit inissiamik attartugallit ineqarnermut innaallagissamullu akiligassat 75 procentiinik tapiifigineqartarlutik aammalu imermut, uuliamut ikummatissamut, paaviaanermut aammalu ulluunerani unnuaaneranilu atserinermut 100 procentimik tapiiffigineqartarlutik.
Ineqarnermi isumamineersumik tapiissutaasartut politikikkut aalajangersarneqarsimasuniit qaffasinnerupput, utoqqalinersisartullu ilaat pisinnaatitaaffimminniit qaffasinnerusunik tapisisarput.
– Utoqqalinersisartut tamaasa assigiimmik piumallugit procentinngorlugit aalajangersimasunik annertussusilinnik ineqarnermi aningaasartuutinut tapiisoqartalersimavoq, tamannali assigiinngisitsinermik kinguneqaannarsimavoq, Nuummi Isumaginnittoqarfik eqikkaalluni naliliivoq.
– Ineqarnermut tapiissutit annertussusaasa kingunerisaannik utoqqalinersisartut inatsisitigoortumik allaninngaanniit soorlu SIK malillugu akissarsialinniit pitsaanerusumik pineqalersimapput.
Sinnera Sermitsiami atuaruk....