UV-mik amermik katsorsaaneq: - Piumaneqarluaqaaq aamma malinnaasinnaanngilagut
Nuummi nakorsiartarfik innuttaasunit 100-nit amerlanerusunit amimikkut nappaatilinnit saaffigineqarpoq, taakku UV-mik amimikkut katsorsarneqarnissaminnik kissaateqarput. Atortut maskiinat qaammatit marluk matuma siornatigut ikkunneqarput, utaqqisullu amerlapput.
UV atorlugu amikkut katsorsarneqarnissaq piumaneqarluarpoq.
Nakorsaq immikkut ilisimasalik Lone Hove, Kalaallit Nunaanni dermatologimut (amermut tunngasunut) suliani akisussaasoq taama oqarpoq.
Nuummi nakorsiartarfimmi UV atorlugu amermik katsorsaanermut atortunik ikkussisoqarneranit qaammatit marluk qaangiuttut taama oqaaseqarpoq.
- Iluatsilluartupilussuuvoq. Nakorsiartut taama amerlatigisut matuminnga kissaateqartut amerlapput, maannakkullu malinnaasinnaanngilagut. Kisianni itigartitsisoqanngilaq, taanna oqarpoq.
Sulisoqarnikkut unammillernartoqarnera
Inuit 100-nit amerlanerusut amimikkut nappaateqartut saaffiginnissimasut, Lone Hove ilisimatitsivoq, taakkunannga qulit maannamut sapaatip akunneranut pingasoriarlutik katsorsarneqartarput. Kisianni ima oqarpoq:
- Marloriaataat katsorsarsinnaagaluarpagut. Kisianni sulisussaqartinngilarput. Peqqissaasumik amigaateqarnitsinnik pissuteqarpoq, aamma nammineq inaateqanngilagut, taanna oqarpoq.
Nakorsap immikkut ilisimasallip maanna nakorsiartut qullernik katsorsaasarfinnukaannissaannik isumaginnittarneranik tamanna ilaatigut isumaqarpoq, naak suliaq peqqissaasumit suliarineqarsinnaagaluartoq. Nakorsiartarfiup maanna sulisussamik eqqortumik ujartuivoq.
UV atorlugu amermik katsorsaaneq siunissami nunarput tamakkerlugu siammarterneqarnissaa, Lone Hovep kissaatigaa, kisianni Nuummi iluatsittumik ingerlatsisoqaqqaarnissaanik pisariaqartitsisoqarpoq.
- Aallartikkaangata assiliisarpugut, naammassigaangatalu aamma assiliisarluta, taamaalilluta katsorsaaneq qanoq annertutigisumik sunniuteqarnersoq takutissinnaassagatsigu. Taamaalilluta peqqinnissaqarfimmi aqutsisoqatigiinnut politikeritsinnullu ornigulluta oqarsinnaassagatta: - Matumunnga aningaasat siulliit pissarsiaraagut aamma iluatsilluartupilussuuvoq. Maanna nunatta sinneranut siammarternissaanut ikiorneqarusuppugut.
Tulleriiaarineq
Naak nakorsiartut arlaleriarlutik katsorsarneqartartussaagaluartut, UV atorlugu amimik katsorsaaneq pitsaasumik sunniuteqalereerpoq, Lone Hove nassuiaavoq. Iluaqutaasoq nalunngilaa. Kisianni UV atorlugu amimik katsorsaaneq nunatsinni sumiiffinni allani salliunneqassanersoq ilisimanngilaa.
- Angusat pitsaasut matumunnga aningaasaliisoqarnissaanut naammannissaat neriuutigaara.
Utaqqisut allattorsimaffianut ilanngunnermit katsorsarneqarnissamut piffissaq qanoq sivisutigisoq utaqqisoqartarnersoq apeqqummut ima akivoq:
- Maanna qulliit atorlugit katsorsarneqarnissamut qaammatit marlussuit utaqqisoqartassaaq. Kisianni suliarisinnaasagut annertusisinnaassagutsigit imaluunniit ulloq naallugu suliaqarsinnaalersinneqarutta, taava sivikinnerussaaq.