Venstre qinersinermi malunnartumik siuariaateqassaaq
Missingersuutit naapertorlugit Venstrep Folketingimi ilaasortaatitai qulingiluat aamma qulit akornanni amerleriassapput, kisianni naalakkersuisutut pissaaneq annaassavaat.
Venstre qinersinnermi malunnaatilimmik siuariarniarpasippoq, kisianni tamatuma saniatigut partiip naalakkersuisuni amerlanerussuteqarunnaarnini uppernarsivaa.
DR-ip missingersuutaa naapertorlugu partii 34-nik ilaasortaatitaqareerluni 43-nik ilaasortaatitaqalissaaq.
TV2-p missingersuutaa ilaasortat 44-nissaannik takutitsivoq.
Venstre 2015-imi qinersinermi partiip ukiuni 25-ini qinersinermi ingerlanerlunnerpaaffianit maanna siuariarneq pivoq.
Qinersisartunit taperserneqarneq annerugaluartoq Venstrep naalakkersuisuutitaqarnini annaaniarpasippaa, Dansk Folkepartimi aamma Liberal Alliancemi ilaasortat affaat sinnerlugit ilaasortaajunnaassammata.
Maanna avatangiisinut ministerip Jakob Ellemann-Jensenip (V) Venstrep qinersinermi angusaa nuannaarutigalugu uggornartoqartippaa.
-Tassami kisitsisit illuatungaanni talerperliit ilaqutariit ataatsimut isigalugit kinguariarput, naalakkersuisunilu pissaaneq uagutsinniikkunnaarpoq.
- Tamanna alianarpoq. Kisianni ilaasortaatitagut siunissami atorsinnaanngortinnissaannut atussavagut, taanna oqarpoq.
Naak partiip naalakkersuisuunini annaagaluaraa, Venstrep siulittaasuni Lars Løkke Rasmussen taarserunnanngikkaa, Jakob Ellemann-Jensen aamma oqarpoq.
Aningaasaqarnermut ministeri Kristian Jensen aamma taama oqarpoq.
- Amerlasooriarlunga taama aperineqarpunga. Maanna tamanna oqaluuserisassaanngilaq, Lars (Løkke Rasmussen, aaqq.) suli siulittaasoralugulu ministeriuneraarput, Kristian Jensen oqarpoq.
Taasinerit 82 procentii kisinneqareersut, DR-ip missingersuutaani partiit saamerliit
91-inik ilaasortaatitaqalissamaarput, tassanilu Alternativet ilanngunneqanngillat, taakku tallimanik ilaasortaatitaqalissamaarput.
TV2-mi partiit saamerliit 89-inik ilaasortaatitaqalissapput, Alternativetilu sisamanik ilaasortaatitaqalissalluni.
Venstrep aamma Socialdemokratietip akornanni naalakkersuisoqatigiinnissaq qineqqusaarnermi Lars Løkke Rasmussenip orniginartillugu oqaatiginikuuaa.
Missingersuutit naapertorlugit partiit taakku marluinnaallutik Folketingimi amerlanerussuteqalersitsisinnaapput, katillugit ilaasortat 91-it aamma 92-it akornanniissinnaallutik.
Socialdemokraatit siulittaasuata Mette Frederiksenip, qineqqusaarnerup ingerlanerani arlaleriarluni Venstrep naalakkersuisoqatiginissaa itigartitsissutigisareerpaa.
Danskit ilaasortaatitaat 175-isut saniatigut Folketingimi Savalimmiunit aamma Kalaallit Nunaannit ilaasortat sisamat ilaasortaassapput.
/ritzau/