umiarsuit takornariartaatit
Visit Greenland: Umiarsuarnut mianersoqqussut ingasaassaavoq
Nunatsinni takornariartitsinermik suliaqartut eqqissisaapput aviisimi akeqanngitsumik agguaanneqartartumi MetroXpressimi umiarsuit takornariartaatit ulorianarnerarneqareersut. Pissutsimmi imaapput Nunatsinni umiarsuarni takornariartaatini ajunaartoqarsimanngisaannarmat, Visit Greenland erseqqissaavoq
Umiarsuarnik takornariartaatinik Nunatsinnut angalanissap taamaatinnissaanut pissutissaqanngitsoq Visit Greenland aamma umiarsuaatileqarfik Arctic Umiaq Line erseqqissaapput. Taakku tamarmik isumaqarput siunnersortip Bjarne Rasmussenip ulorianarneraanera ingasaassaasoq.
- Pissutsimmi imaapput ataasiarluniluunniit umiarsuit apornerannik kinguneqartumi ajunaartoqarsimanngisaannarmat umiarsuit takornariartaatit 1980-kkunni angallassisalermatali. Aamma sillimaniarneq pitsanngoriartuinnavippoq aammalu inatsisit nalunaarutillu naleqqussarneqartuarput umiarsuit angalariaasiat malillugu, Visit Greenlandimi siunnersortaaneq Malik Milfeldt oqarpoq.
Allaaserisami MetroXress-imi saqqummiunneqartumi oqaatigineqarpoq nunatsinni kassorujussuaqartarnera pissutigalugu umiarsuarnik takornariartaatinik angalaneq ulorianarsinnaasoq.
Nakkutigeqqissaarneqarput
Umiarsuaatileqarfilli Arctic Umiaq Line ilaasunik angallassinermik suliaqartoq nalunaarpoq sikut pillugit nalunaarutinik umiarsuit paasissutissinneqartuartartut.
- Imaatigut angalaneq pinngortitap atugassarititai malillugit ingerlavoq, aamma sikut eqqarsaatigalugit. Ukiuni 100-jukkaani Nunatsinni tamanna atugaraarput taamalu pinngortitaq maniguuffigalugu atorlugu. Soorunami sikut Kalaallit Nunaanni mianersorfissaapput taamaammat sillimaniartoqartariaqarpoq umiarsuillu ilaasartaatut assartuutillu ullutsinni nutaaliaalluinnartunik atortoqarput DMIp sikunik alapernaarsuiffianit paasissutissanik pilersorneqartuarlutik, Arctic Umiaq Linemi pisortaq Jette Larsen oqarpoq.
- Taakku saniatigut inatsisitigut piumasaqaataavoq angallavigisamik ilisimaarinnittumik umiarsumi sumiissusersiortoqarnissaa. Taamaammat sikup ulorianarnera assersuussinnaavarput timmisartut silarlutsillugu silarloqarfimmik avaqqutsisarnerannut aammalu pissutsinut atuuttunut naleqqussartarnerannut, Jette Larsen erseqqissaavoq.