Vittus: Inummut ilanngaatip qaffanneqarnera akisussaaq

Inatsisartut upernaakkut sivikillisamik ataatsimiinnerminni pisarneq malillugu aappaagu akileraartarnermut ilanngaatit aalajangersarpaat. Aningaasaqarnermut Akileraartarnermullu ataatsimiititaliap piaartumik qaffaasoqarnissaa piumasaraa, aningaasalli nassaarineqaqqaartariaqartut Vittus Qujaukitsoq oqarpoq.

Naalakkersuisunit uku kissaatigineqarput:

• Inummut ilanngaat kr. 48.000 (ukiumut)
• Ilanngaat aalajangersimasoq kr. 10.000 (ukiumut)
• Aningaasarsiat B akileraaruteqaataasussaanngitsut kr. 5.000 (ukiumut)
• Killilimmik akileraartussaatitaasunut ilanngaat kr. 1.000 (ukiumut)

Ilanngaatit taama isikkoqartillugit Inatsisartunit akuerineqarput, annertussusaalli oqallisigineqangaatsiarlutik. Assersuutigalugu inummut ilanngaat 2005-imili nikisinneqarsimanngilaq.

Ilanngaatit pillugit siorna aamma oqallittoqarpoq. Naatsorsuinerit takutippaat ilanngaat 2020-mi 61.800 koruunimiittussaassagaluartoq, akinut akissarsianullu nalimmassarneq 2005-2020-mut malinnaasimagaluaruni.

Ataatsimiititaliaq nassuiaateqaqqusivoq

Ilanngaammik qaffaanermi annertuumik ajornartorsiutaasussaq tassaavoq, nunatta karsiata akileraarutitigut isertittagaasa ikileriarujussuarnissaat. Tamanna pissappat Naalakkersuisut sipaarniuteqartariaqalissapput. Taamaammat ilimanarluinnarpoq, ilanngaatit maanna annertussusaattut atuuttussanngorlugit Inatsisartut tallimanngorpat aalajangiinissaat.

Inatsisartut Aningaasaqarnermut Akileraartarnermullu Ataatsimiititaliaata isumalutissiissummini allappaa, ilanngaatinik qaffaanissaq utaqqisinneqaqqinneqarsinnaanngitsoq:

- Ilanngaatit assigiimmik agguataariffiusumik ukiumoortumik qaffanneqameri qanoq kinguneqassanersoq pillugu nassuiaarnmik Naalakkersuisut saqqummiusseqqullugit ataatsimiititaliamit piumasaqarfigineqarput. Ukiut tulliuttut sisamat assersuutitut atomeqarsinnaasut ataatsimiititaliamit matumani isumaliutigineqarpoq.

Aningaasaqarnermut Naalakkersuisup Vittus Qujaukitsup akissuteqaammini, inummut ilangaatip ukiuni sisamani qaffakkiartuaatinneqarnera 8.000 koruuninik akeqassasoq assersuutigaa.

- Taava assigissavaa ukiumut 37 mio. kr.-nik aningaasanut inatsimmut aningaasaliinissaq pisariaqassasoq.

Aaqqissuusseqqinnissamut mianersoqqusisoq

- Maanna aningaasaqarnikkut inissisimanermi Naalakkersuisut qanoq, taakku qaffaanerit pisortat sullissinermi akilersuutaannit annertuumik sipaarnani aningaasalersorneqassanersut isigisinnaanngilaat, Vittus Qujaukitsoq allappoq.

Aningaasaqarnermut Akileraartarnermullu Ataatsimiititaliamit aamma kissaatigineqarpoq, akileraartarneq aaqqissuuteqqinneqassasoq, tassungali atatillugu Aningaasaqarnermut Naalakkersuisup innersuussutigaa suliniutit atuutsinneqangajalersut suliaralugit allartinneqareersimasut.

Pineqartut tassaapput sulinermi akileraarutinut ilanngaat, nunani allani pensionisianut aaqqissuussanut akiliutigisat akileraarusersorneqarnerat, Ilanngaassivik aamma ingerlatseqatigiiffiit akileraarutaanik appaaneq:

- Taakku suliniutinit misilittakkat ersersippaat, isumatusaarnerusoq immikkoortukkuutaarlugit suliniutit ingerlannissaannut, suliniutinillu nutaanik pilersitsinnginnissaq aaqqissuusseqqinnerit inissinnginneranni , Vittus Qujaukitsoq ilanngussilluni oqarpoq.