Vivian Motzfeldt Inatsisartut siulittaasuattut ingerlaqqippoq
Vivian Motzfeldt Inatsisartut siulittaasuattut inersuarmi taperserneqarluarni ingerlaqqippoq. Partiit arlaannit siulittaasussatut unammillertissaanik qinigassanngortitsisoqanngilaq.
Vivian Motzfeldt ukiakkut ataatsimiinnerup ulluani siullermi Inatsisartut siulittaasussaattut innersuussutigineqarmat unammillertoqanngilaq.
Nunami inissisimaffiit pissaaneqarnerpaaffianni, Inatsisartut siulittaasussaannik taasisoqarmat 28-t akuersaarput, akerliusoqanngilaq ataaserlu taasinngitsoorluni.
Siulittaasunngoqqittup partiinit tamanit innersuussisimaneq qujassuteqarfigaa:
- Tatiginninerup tamatuma nukissannik tunivaanga, neriorsussavassilu suliassaq Inatsisartuni suliarilluarneqarumaarmat.
Malittarisassat malillugit qinigassanngortittumik taasisoqartussaavoq, ataaasiinnarluunniit innersuussutigineqarsimagaluarpat.
Qinigassanngortittoq qinerneqartarpoq, Inatsisartuni taasisimasut affaat sinnerlugit pissarsiarisimagaanni.
Vivian Motzfeldt pillugu:
1972-imi junnip qulingani inunngorpoq, Jørgen Wæver Johansen uigivaa sisamanillu qitornaqarluni
Siusinnerusukkut atuuffigisimasai:
Maj – oktober 2018 Ilinniartitaanermut, Kultureqarnermut, Ilageeqarnermut Nunanullu allanut Naalakkersuisoq
2017 – 2018 Tunngaviusumik Inatsisissaq pillugu Isumalioqatigiissitami siulittaasoq
2017 – Siumup Siulersuisuuneranni Ulluinnarnilu Aqutsisuini ilaasortaq
2014 – 2018 Siumut sinnerlugu Inatsisartuni ilaasortaq (2018-imi maajip qaammataaniilli Inatsisartunit sulinngiffeqarpoq )
Siulittaasoqarfimmi inissat allat ukunannga inuttalerneqarput
Siulittaasup tullia Mimi Karlsen (IA) sinniisussaralugu Stine Egede (IA)
Siulittaasup tulliata aappaa Simigaq Heilmann (D) ssinniisussaralugu Malene Vahl (D)
Siulittaasup tulliata pingajuat Nikkulaat Jeremiassen (S) sinniisussaralugu Jens Danielsen (S)
Siulittaasup tulliata sisamaat Peter Olsen (IA) sinniisussaralugu Aqqa Samuelsen (IA)