Vivian Motzfeldtip Lars-Emil taarsernissaanut piareersimavoq

Tunngaviusumik Inatsisissamut Isumalioqatigiissitami Kalaallit Nunaata namminersulivinnissaanut sinaakkutinik ilusilersuisussami siuilttaasunngorusunnani, Inatsisartunut siulittaasup Lars-Emil Johansenip maanna pisortatigoortumik nalunaarutigaa.

Aamma atuaruk: Lars-Emil Johansenip siulittaasuuffik taamaatippaa

Lars-Emil Johansen Tunngaviusumik inatsimmut isumalioqatigiissitamut Siumumit siulittaasussatut inassutigineqarpoq, taanna partiini annerpaagami siulittaasuutitaqartussaavoq. Siumumi ilaasortaq alla Tunngaviusumik inatsimmut isumalioqatigiissitamut ilaasortassatut Inatsisartunut ilaasortaq Vivian Motzfeldt inassutigineqarsimavoq.

Taamaammat tunuarpunga
Lars-Emil Johansenip aalajangernini ima tunngavilersorpaa:

- Akerlianik isumaqarnarpoq – innuttaasut akornanni oqallinneq naapertorlugu – aporfissaararpassuaqartoq Inatsisartut siulittaasuattut atuuffimma saniatigut peqatigitillugu tunngaviusumik inatsisiliornissamut isumalioqatigiissitap siulittaasuatut atuutilissagaluaruma. Taamaattumik aamma tamanna tunngavigalugu naatsorsuutigivara Tunngaviusumik inatsisiliornissamut isumalioqatigiissitami sulineq eqqarsaatigalugu innuttaasut akornanni nalinginnaasumik oqallinnermi tamakkiisumik peqataasinnaanissannut naalakkersuinikkut periarfissanni killilerneqassallunga peqatigitillugulu Inatsisartunut tamarmiusunut siulittaasutut atuuffik isumagiitigalugu.

- Uannut pingaaruteqarpoq erseqqissassallugu Tunngaviusumik inatsisiliornissamut isumalioqatigiissitamut siulittaasutut atuuffimmut ivertinneqarneq – tunngavissalimmik tunngavissaqanngitsumilluunniit – aporfiussanngimmat tatiginninnerup Inatsisartut siulittaasuattut atuuffimmut qinerlunga Inatsisartut takutissimasaata innarlerneqarnissaanut. Isumaqarpungalu aamma taamatut pingaaruteqartigisoq kialuunniip Tunngaviusumik inatsisiliornissamut isumalioqatigiissitamut siulittaasussatut toqqarneqartup tamatigoortumik apeqquserneqarsinnaanngitsumillu tapersersorneqarnissaa.

Vivian Motzfeldt: Piareersimavunga
Oqarasuaatikkut sivikitsumik oqaloqatigiinnikkut nunami allami mittarfimmi aallariartortarfimmit Vivian Motzfeldt Sermitsiaq.AG-mut ilisimatitsivoq:

- Siumup gruppiata siulittaasussatut inassutigissagaluarpanga piareersimalluinnarpunga.

Timmisartumut ikiartoqqusaanini pissutigalugu tamanna pillugu itisiliinissani angumerinngitsoorpaa.

Paasissutissiineq amigaataavoq
Siumumi politikkikkut oqaaseqartartoq, Karl-Kristian Kruse, Siumut gruppimi ataatsimiinnissamut qaaqqusingajalersoq naatsorsuutigalugu Sermitisiaq.AG-mut ilisimatitsivoq, tassani siulittaasuuffik pillugu tupaallannartumik pisoqarnera oqaluuserineqassaaq.

Siumumi qanoq aalajangertoqassanersoq nalorninartoq
Siumup Inatsisartunut ilaasortaatitaasa Vivian Motzfeldt assersuutigalugu ataqqinaataasumik siulittaasuuffimmut inassutigineqassanersoq ilisimatitsissutigineqarnissaa periarfissaasimanngilaq.

Aamma atuaruk: Lars-Emilip marloqiusamik atorfeqarnissaa ataatsimiititaliap akueraa

Inatsisartunimi Qinigaanerup Misilinneqarnissaanut Ataatsimiititaliami tallimanngormat aalajangerpaa, Lars-Emil Johansen, naak Inatsisartunut siulittaasuugaluarluni Tunngaviusumik inatsisissamut isumalioqatigiissitami siulittaasunngorsinnaasoq akuerineqarpoq. Marloqiusamik atorfeqarnissaa isornartorsiorneqartoq aporfiusimanngilaq.

Lars-Emil Johansen isumalioqatigiissitami ilaasortanngorniarani oqarpoq:

- Taamaattumik partiinnut ilisimatitsissutigaara tatiginninneq parteeqatima ersersissimasaat tanngassimaarutigigakku, qujamasuutigalugulu sulisinnaassusera misilittakkakkalu isumalioqatigiissitap sulinissaanut pingaaruteqarsinnaasutut isumaqarfigineqarsimammata, kisianni aamma Inatsisartut siulittaasuattut oqallinneq malinnaavigisimagakku tamannalu tunngavigalugu nalilerlugu Tunngaviusumik inatsisiliornissamut isumalioqatigiissitamut ilaasortatut siulittaasutulluunniit inissinniarnanga, Inatsisartuni siulittaasoq tusagassiuutinut nalunaarummi allappoq.

Aamma atuaruk: Atorfimmut pingaarutilimmut tulluartuua?

44-nik ukioqartoq Vivian Motzfeldt, Lars-Emil Johansenip akerlianik 70-iliisimasumit ukiui tulluarput. Taanna Kommune Kujallermi borgmesteri, Jørgen Wæver Johansen, Siumumi aamma politikeriusoq uigaa.