Wæverip Kielsen tapersersorpaa

Partiimi Siumumi siulittaasuugallartup Jørgen Wæver Johansenip Kim Kielsen partiimi siulittaasussatut tapersersorlugu sapaammi nalunaaruteqarpoq. Siumumi siulittaasumik qinersisoqassaaq oktobarip 18-ani. Taamaasilluni Siumut Inatsisartunut qinersinermi Jørgen Wæver Johansenip Kim Kielsen Naalakkersuisut siulittaasussaattut taperserpaa.

Kommune Kujallermi borgmesteri Jørgen Wæver Johansen kujataani suliniutik aallussiinnarniarluni Siumumi siulittaasutut qinigassanngortissanngilaq.

- Nunatta kujataani suliniutit aallartissimasagut ikerinnakkut qimannianngilakka. Borgmesteritut uannik tatiginnillutik qinersinikut neriorsornikuuvakka Qaqortumi najugaqaannarniarlunga – taamatullu neriorsuuteqarnera soorunami attappara, Jørgen Wæver Johansen tusagassiutinut nalunaarummi oqarpoq.

- Kommune Kujallermi kommunalbestyrelsemi tamarmiulluta – partiit
killeqarfii akimorlugit suleqatigiippugut, inuiaqatigiinnut pitsaasumik angusaqarumalluta, taamatullu suleqatigiissinnaassuseqarluta ingerlatsinerput qimaannarnianngilara. Tamatta siunissamut neriuuteqarnissarput pisariaqartipparput – uanga Nunatta kujataani siunissaqarluartugut upperivara neriuuteqarfigalugulu, nalunngilara tassani suleqataanera inunnut Kommune Kujallermi najugaqartunut pitsaasumik kinguneqarsinnaasoq. Aamma ataataavunga, sulilu angerlarsimasunik meerartaqarluta, taakkulu kujataani najugaqarnertik nuannarilluinnarpaat, taakkulu pingaartitaat soorunami uannut aamma pingaaruteqaqaat, Siumumi siulittaasuugallartoq nassuiaavoq.

Kim Kielsen misilittagaqarluartoq
Siumumi siulittaasussatut piukkunnartut arlaqartuusut Kommune Kujallermi borgmesteri oqarpoq.

- Tamatuma saniatigut qujanartumik Siumumi pikkorissunik siuttussaaleqisanngilagut, partiitsinnik siulersuilluarsinnaasunik. Taakkorpassuillu akornanni nalornissutiginngivippara, maannakkut pissutsit taamaanneranni, Kim Kielsen tassaammat siulittaasuunissaminut piukkunnarnerpaaq, taamalu Inatsisartunut qineqqusaarnissami partiip siuttusssaa. Kimmi misilittagartuujuvoq
Inatsisartuniinnaanngitsoq aammali Naalakkersuisuni ilaasortaasarnermigut,
tatiginarluinnartuuvoq oqaaseqaraangamilu unneqqarissuujuaannarluni, Jørgen Wæver Johansen naqissusiivoq.

- Aamma nalornissutiginngivippara Kimmi partiinik allanik suleqatissarsiornissami
naapititeriaallaqqinnerpaassasoq, apeqqutaatinnagu partii sorliunersoq. Naluneqanngitsutullu partiit akornanni suleqatigiissinnaaneq tassaavoq nunatta maanna pisariaqartitaa minnerunngitsumik partiit annerit marluk akornanni suleqatigiittoqarnissaa, tusagassiutinut nalunaarummi Jørgen Wæver Johansen oqarpoq.