nannut
WWF-ip nalunaarusiaa: Issittumi nannut paarineqanngippallaarput
Nunat tamalaat isumaqatigiissutaasa 5 procentiinnaat anguneqarsimasoq WWF allappoq
Nunat nanoqarfiusut, Norge, USA, Ruslandi, Norge aamma Kalaallit Nunaat, nannut pillugit pisussaaffitik tamakkiisumik angunianngikkaat WWF allappoq.
Ilulissani isumaqatigiissut 2015-mi atsioqatigiinneqartoq, The Circumpolar Action Plan for the Conservation of Polar Bears, aallaavigalugu WWF taamatut oqariartuuteqarpoq.
Tassani isumaqatigiissutaagaluarpoq nannut pillugit suliniartoqassasoq. Anguniagassat 62-it nunat nanoqarfiusut anguniassallugit isumaqatigiissutigigaluarpaat, tassani ilaatigut ilaapput nannunik illersuinissat kiisalu misissuinerit amerlanerusut.
Suleqatigiinnissaq ujartorneqarpoq
Anguniagassaasimasut 5 procentiinnaat anguneqarsimasut WWF ilisimatitsivoq.
- Nunat angusaqarnavianngillat ima ingerlaannaraluarunik. Suleqatigiinnerusoqartariaqalerpoq, isumaqatigiissutigineqartullu anguniarneqarnissaat pimoorunneqartariaqalerluni, WWF Verdensnaturfondenimit Kaare Winther Hansen oqarpoq.
Nannut 2050-mi pingajorarterutaannanngorsimassasut ilisimatuunit naatsorsuutigineqarpoq, tassani silaannaap allanngoriartornera pissutaaqataatinneqarluni.
Suleqatigiinnissaq
Nannunik pisassiinerit aalajangersimasuuneri Kalaallit Nunaat nersualaarneqarpoq.
- Taamaasilluni ikilisaataanngitsumik piniarneqarput, Kaare Winther Hansen ilaatigut oqarpoq.
Taamaattoq aamma Kalaallit Nunaat isornartorsiorneqarpoq.
- Inuit nanorsiornerulernikuupput. Nannut pisarineqarnerusalersimapput, pisassiissutigineqartut ikilisinneqarneq ajorlutik pisarineqareeraangata. Nanoqartillugu iliuusissat ersarinnerusariaqarput, aamma qanoq nanorsiortoqartigisarnersoq misissorneqartariaqalerpoq. Ittoqqortoormiini nannut takussaasorujussuusarput, tamanna WWF-imit iliuuseqarfiginiarneqartariaqartoq isumaqarpugut. Inuit toqqissisimaneq ajorput taamaattoqartillugu. Namminersorlutik Oqartussat kommunillu suleqatigiinnerulertariaqarput, Kaare Winther Hansen oqarpoq.