Naalakkersuisooqatigiilersut
WWF: Pinngortitaq avatangiiserlu eqqaamaneqarlik - urani sianigineqarli
- Aatsitassarsiorfiit mingutitsisinnaaneri Siumup siulittaasuata Kim Kielsenip ilisimavai. Kalaallit Nunaata isertitassaralui annaasaqaataasinnaapput taamaattoqassagaluarpat. Taamaattumik sukangasuunik inatsiseqartoqartariaqarpoq, WWF-imit oqaatigineqarpoq
- Naalakkersuiunngortitsiniarnermi urani qitiulluinnarsimassasoq takuneqarsinnaavoq. Uranisiortoqalissappat sukangasuunik inatsiseqartoqarnissaa siunnersuutigaarput, mingutitsisoqassappammi annertuumik kinguneqassaaq.
WWF Verdensnaturfondenip allattaanera Gitte Seeberg naalakkersuisunngortitsisoqarnera pillugu oqaaseqarpoq.
Pinngortitamut avatangiisinullu naalakkersuisuusimasutut Kim Kielsenip kingunerisinnaasut ilisimassagai neriuutigineqarpoq.
- Inuussutissarsiutit allat eqqorneqarsinnaapput uranisiortoqarnerani mingutitsisoqassagaluarpat. Aningaasat isertinneqartussat eqqorneqarujussuarsinnaapput, taamaattumik sukangasuumik aatsitassarsiornermi inatsiseqartoqarnissaa neriuutigaarput.
Uranimut akerliusut aamma tusaaneqartariaqartut oqaatigaa.
- Innuttaasut affangajaasa uranimut akerliusunut Inatsisartuni qinersinermi taasipput. Partiit taakku marluk illuatungiliuttuusussaapput. Uranisiortoqarnissaa akerleriffigaat. Ikinnerussuteqartut amerlalluinnartut aamma tusaaneqartariaqarput aamma aarlerisaat tusaaneqartariaqarput, Gitte Seeberg oqarpoq.
Siumut, Atassut aamma Demokraatit naalakkersuisooqatigiinnissamik isumaqatigiissuteqarput sisamanngormat.