Aalisarnermut akuersissutit amerlassusaat aningaaserivimmit ernumassutigineqarpoq
Aalisarnermut akuersissutit ukiut pingasut ingerlanerini (2013-2016) 78 procentimik – akuersissutit nutaat 1000-t missaanni – qaffariaateqarsimanerat, Grønlandsbankenimit assut ernumassutigineqarpoq.
Sinerissap qanittuani qaleralinniarneq 36 procentimik qaffariaateqarsimasoq Grønlandsbankenimit maluginiarneqarpoq, qaffariaallu aalisarnermut akuersissutit amerleriaateqapiloorsimaneranut attuumassuteqarnerarlugu.
Assut ernumanartoq
- Taama malunnaateqartigisumik aalisarnerup iluani qaffariaateqarneq assut ernumarnartoqarpoq, piffissamimi 2013-miit 2016-imut uumassusilerituut pisassiissutissatut innersuussuteqartarnerat malinneqartarsimanngilaq, aningaaserivik ukiumut naatsorsuutit saqqummiunneqarneranut atatillugu, nalunaarusiami allappoq.
Ineriartorneq inuiaqatigiinnut immikkut iluanaarutaanngitsoq, aningaaserivimmit erseqqissarneqarpoq.
- Aalisarnermut akuersissutit aalisarnermiit sukkanerusumik ineriartornerisa kingunerisaanik, aalisartut ataasiakkaat isertitaat ikinnerupput. Kalaallilluaalisakkerivinni sulitinneqarnerat immikkut iluanaaruteqarfiunanilu umiatsiaaqqanik ikummatissanillu tikisitsinerit akisungaatsiarsimapput, aningaaserivik nalunaarusiamini allappoq, aalisakkerivinnilu sulisussaaleqineq tikkuarlugu.
Kaammattuut
Grønlandsbankeni Naalakkersuisunut kaammattuuuteqarpoq uumaassusilerituut innersuussutaannik malinnittaqqullugu. Aningaaserivik isumaqarpoq uumassusilerituut aalisagartassiissutitut innersuussutai tamarmik malinneqartariaqartut, tamanni qaleralinnut saarullinnullu atatillugu malinneqanngilaq. Raajarniarnermilu pisassiissutissat pillugit uumassusilerituut innersuussutigisartagaat Naalakkersuisunit malinneqarpoq.