Nuuk
Aallartitsisut siuariartortitsissapput
Sermersuumi Inuussutissarsiornermut Siunnersuisoqatigiit sapaatip akunnerani tullermi aallartitsinissamut periarfissat sammitinniarpaat
Kattuffimmit Global Entrepreneurship Weekimit isumassarsisinneqarluni Sermersuumi Inuussutissarsiornermut Siunnersuisoqatigiit novembarip 17-ianniit 19-iannut siuariartornermik aallartitsinermillu sammisaqartitsiniarput.
Siuariartorneq
Tassami siunnersuisoqatigiit isumaat naapertorlugu siuaiartornermik pilersitsisoqarsinnaavoq aallartitsisarnerup ineriartortinneqarneratigut. Taamaattumillu pingaaruteqarpoq oqaluttuarissallugu aallartitsineq inuusuttunut utoqqaanerusunullu inuuniarnermi aqqutissaalluartoq.
– Inuit aallartitsisunngornissaannik kajumissuseqalersinniarpavut ammasumik aaqqissuussinertigut marlutsigut, tamatumani kikkut tamarmik nammineq ingerlatsivimmik aallartitsinissaq ilinniarsinnaallugu, Sermersuumi Inuussutissarsiornermik Siunnersuisoqatigiinni siuinnersortaaneq Morten W. Nielsen erseqqissaavoq.
Isumassarsiorit
Aaqqissuussinissani peqataasut tusaasinnaavaat aallartitsisut allat, ingerlatsivimmik ingerlalluartumik pilersitsinermik misilittagallit. Naapinneqarsinnaapput Aviaaja Ezekiassen aamma Ninna Kjærgaard Nielsen, ilusilersuinermik illussanillu titartaanermik ingerlatsivimminnik ineriartortitsileruttortut. Soundaboks-imillu ingerlatseqatigiit - festivalernermi højttalerinik angallattakkanik suliallit, Jesper Theil Thomsenip aamma Hjalte Emilio Wiethip ingerlatsivitsik oqaluttuarissavaat.
Kalaallit nutaaliortut
Aamma tusarnaarneqarsinnaavoq kalaallit aallartitsinermik kulturiat pillugu Sebastian L. Møllerip Alexander H. Jensenillu specialiliaat. Angutit inuusuttut taakkua marluk Kalaallit Nunaanni ingerlatsivimmik aallartitsinermi atugassarisat pillugit annertunerusumik misissuinertik naammasseqqammerpaat, aallartitsisunullu atugassarisinnaasat nuaat unammilligassallu oqaluttuarissavaat.
Atugassarisat pitsaanerusut?
Peqataaneq akeqanngilaq. Ammasumik aaqqissuussinerit saniatigut inuussutissarsiorneq pillugu matoqqasumik isumasioqatigiittoqassaaq. Tassani pisortaneersut, inuussutissarsiortunit namminersortuneersut aallartitsisuneersullu oqaluuserissavaat siunissami aallartitsinermi atugassarisat qanoq pitsanngorsarneqarsinnaanersut, siunnersuisoqatigiit paasissutissiipput.