KL

DK

Aaqqissuisuuneq innersuussivoq: Akisussaqaaq

Illuliornermut malittarisassakkut nutaakkut nunatsinni illut nukissamik atuinissaannut piumasaqaatit sakkortusineqarput. Tamanna sanaartortitsisunut akisussaqaaq, Sulisitsisut Peqatigiiffiat oqarpoq.

Sulisitsisut Peqatigiiffiata ernumaga illuliornermut malittarisassat nutaat atuutilerpata sanaartorneq akisunerulissasoq.
Jesper Hansen

Nunatsinni illuliornermut malittarisassat nutaat, pilersaarutit malillugit ukiut 2021-2022-ip nikinneranni atuutilersussat, aningaasartuutissaat Kalaallit Nunaanni Sulisitsisut Peqatigiiffiata ernumanartoqartippai.

Aaqqissuisuuneq innersuussivoq

Allaaserisaq una aviisimit Sermitsiamit tigusaavoq, aaqqissuisuunermit Poul Krarupimit toqqarneqarluni.

Taamaalillutit nittartakkami atuartartutut aviisimi allaaserisamik, nalinginnaasumik aningaasanik akeqartartumik atuarsinnaallutit. Neriuppugut allaaserisaq aviisit allaanerunerannik aamma tusagassiutini akeqanngitsuni issuakkatut nutaarsiassaannaannginnerannik takutitsiumaartoq. Aviisit pitsaassusaat annertooq itisiliinernit aamma tunuliaqutinik aamma minnerunngitsumik inuit pillugit allaaserilluakkanik pissuteqarput.

Neriuppugut misiliummik pisartagaqalernissannut isumassarsiorfigisinnaagit, taamaalillutik inuiaqatigiit ineriartornerannut malinnaalluarsinnaanerussagavit.

Aviisimut neqeroorummik pissarsigit – 38 39 40 sianerfigiuk imaluunniit mail adm@sermitsiaq.gl allaffigalugu

Illuliornermut malittarisassanut siunnersuut (BR21) tusarniaavigineqaqqammerpoq. Sulisitsisut Peqatigiiffiata tusarniaanermut akissummini taassuma aningaasatigut kinguneqaatissai ujartorpai.

Pingartumik nukissamik atuinermut malittarisassat sakkortusineqarnerannik immikkoortoq GE-p ernumanartoqartippaa. Tusarniaanermi akissummini, arfinilinnik quppernilimmi, sulisitsisut peqatigiiffiat allappoq:

“Kapitali 7-imi (nukissamik atuinermut tunngasumi, aaqqiss.) piumasaqaatit naammassiniarnissaannut annertunerusumik siunnersorteqarnissaq pisariaqartinneqassaaq. Tassa imaappoq, sanaartortitsisumut akisunerulissaaq siunnersortimullu piffissamik atuinarnerulissalluni.

Tamanna sanaartornerup akianut/kvadratmeterimut akianut, qanoq kinguneqassanersoq naatsorsuinerit amigaataapput. Atortussanut, sanaartukkap ingerlanneqarneranut teknikkikkullu siunnersuinermut immikkut saniatigut aningaasartuutissanut, nukissamut sipaaruteqarnissamut naatsorsuinernut sanilliullugit takunissaat soqutiginassaaq.”

Kinguneqaatissat GE-p paaserusuppai

– Illuliornermut malittarisassat nutaat malillugit sanaartorneq akisunerulissasoq qularutissaanngilaq. Paaserusupparpulli tamanna qanoq kinguneqassanersoq – assersuutigalugu illumut 100 kvadratmeterinik angissusilimmut sananermi, GE-mi allattoqarfimmi pisortaq Karsten Lyberth-Klausen oqarpoq.

Paasissutissat

Illuliornermut malittarisassat sanaartornermi “inatsisaapput tunngaviusut”, tassuunakkullu Kalaallit Nunaanni sanaartornermut malittarisassat ersarissumik aalajangersarneqarput. Malittarisassatigut qulakkeerneqassaaq sanaartugaq naammaginartumik ingerlanneqarlunilu atortulersorneqassasoq, isumannaatsuunermut, peqqinnermut nukissamillu atuinermut pissutsit eqqarsaatigalugit. Ilaatigut atortulersorneranut, sananeqaataanut, ikuallattoornissamut, silaannarinneranut, nukissamik atuinissaanut ikkussugassanullu piumasaqaateqartoqarpoq.

Malittarisassat atuupput inissialianut aammalu inuussutissarsiornermut suliffeqarfittullu illulianut tamanut, kiisalu garage-anut, quinut saniatigullu sanaartukkanut allanut, inissialianut inuussutissarsiornermilu illulianut attuumassutilinnut.

Sanaartornissamut qinnuteqaat nalinginnaasumik titartakkanik makkuninnga imaqartassaaq.

a. Nunamerngup sanaartorfissap tunniunneqarsimasup sumiissusianik titartagaq, sanaartugassap nunaminermi (sanaartorfimmi) inissisimanera aammalu sanaartugassap illunut sanianiittunut sanilliullugu inissisimanera. Sanaartugassap illullu sanianiittut qanoq imminnut ungasissuseqarnerat allassimassaaq. Sanaartorfiup nunami avatigisamini qanoq qaffasitsiginersoq nalunaarsimassaaq.

b. Titartakkatigut allaaserineqarneratigullu nassuiarneqassapput sanaartukkap siunertaa, atortut atorneqartut, toqqavilerneqarnera, sananeqaataa, tamarmik ima annertutigisumik sanaartukkap illuliornermut malittarisassani aalajangersakkanik naammassinninnersoq nalilerneqarsinnaassalluni. Sanaartukkap najummisuisa allaaserineqarnerat kiisalu sanaartukkap nukissamik atuineranut pissutsit (kiffialersorneqarnera, silaannarissaatai, kiassarneqarnera imermillu kissartumik pilersorneqarnera) ilanngunneqassapput.

c. Titartakkat sanaartukkap nutaap kuuffilersorneqarneranik imermillu pilersorneqarneranik, innaallagissamik attavilerneqarneranik aqqusineqarneranillu takutitsisut, imaluunniit pissutsinik taaneqartunik allanngortitsisunik takutitsisut.

Illuliornermut malittarisassat maanna atuuttut (BR06) 2006-ip naanerani atuutilernikupput.

– Tassami Kalaallit Nunaanni sanaartorneq akisoreeraaq, taanna nangilluni oqarpoq.

Nukissamik atuinermut immikkoortoq Ineqarnermut Attaveqarnermullu Naalakkersuisoqarfimmut, illuliornermut malittarisassanik nutaanik siunnersuummik suliarinnissimasumut, qitiusumik inissisimasimavoq. Tusarniaanermut saqqummiussinermi ilaatigut allassimavoq:

Piumasaqaatit sakkortunerusut

“Inuiaqatigiinni silap pissusiata allannguutaasa aammalu suliniutit nutaat, silaannarmut CO₂-mik aniatitsinermik annikillititsinissamik siunertaqarfiusut annertusiartortumik

eqqumaffigineqalernerat tassunga tunngaviusutut isigineqassapput. Tamanna aamma illuliornerni sanaartornernilu, nukissiuutinik annertuumik atuiffiusuni atuuppoq”.

Taamaattumik naalakkersuisoqarfiup siunnersuutigaa nutaamik illuliani nukissamik atuinerup qaffasinnerpaaffissaanut piumasaqaat sakkortusineqassasoq, aammalu illuliat kiffiaatilersorneqarnissaannut piumasaqaatit sakkortusineqassasut. Tamatuma saniatigut sanaartornermik oqartussaasut nutaamik illuliat uuttortaanikkut qanoq oqortiginerisa uppernarsarneqarnissaat piumasarisinnaavaat.

– Nukissamik atuinikinnerusunik sanaartortoqarnissaanik naalakkersuisoqarfik isumaqatigilluinnarparput. Aamma akueraarput BR21-imut missingersuusiornermi annertuumik suliaqartoqarsimasoq, naatsorsuinerilli, suliamut naapertuuttumik nukissamik sipaaruteqarnermik takutitsisut, amigaatigaavut, Karsten Lyberth-Klausen oqarpoq.

Silap pissusianut zonet

Siunnersuummi illut kiffiaatilersorneqarnissaannut piumasaqaammi tunngaviuvoq Kalaallit Nunaata silap pissusianut zonenut marlunnut avinneqarsimanera, siulleq Nanortalimmiit Maniitsup tungaanut atuulluni, aappaalu Sisimiuniit Qaanaamut atuuuni.

Tamanna Sulisitsisut Peqatigiiffiata ernumanartoqartippaa, kissaatiginartippaalu tassuunakkut nunap immikkoornerusumik avinneqassasoq:

– Avitsinerup taassuma kingunerisinnaavaa assersuutigalugu Upernavimmi sanaartukkap Ilulissani sanaartukkamit akimigut nikingassutaa ullumikkuminngarnit anginerulersoq. Tamanna Avannaani nutaamik sanarusunnermut aningaasatigut aporfiusinnaavoq. Immaqa eqqornerussagaluarpoq Kalaallit Nunaat silap pissusiatigut immikkoortunut pingasunut avinneqartuuppat – kujataanut, qeqqanut avannaanullu, Sulisitsisut Peqatigiiffiat isumaqarpoq.

Illuliornermut malittarisassat nutaat tusarniaavigineqarnerat marsip aallaqqaataani naavoq. Maanna oqaaseqaatit nalilersorneqassapput illuliornermullu malittarisassanut atuutilersussanut ilanngunneqassallutik, Ineqarnermullu aammalu Attaveqarnermut Naalakkersuisoqarfiup naatsorsuutigaa taanna juunip naanerani naammassineqassasoq, taamaasilluni 2022-imi ukiut nikinneranni atuutilersinnaassalluni.

Aviisi Sermitsiaq uani pisiariuk:

inuussutissarsiutit
Powered by Labrador CMS