soraarnerussutisiat
Aaqqissuusseqqereererup kingorna: 151-it pisartakkatik annaavaat
Juulip aallaqqaataanit inuit 151-it siusinaarlutik pensionisiallit pisartagaqarunnaarput, isertitaqarpallaarnertik pissutigalugu
Innuttaasut 151-it maanna siusinaartumik pensionisianik pisartagaqarunnaarput, pisortanit pisartakkat saniatigut annertuallaamik isertitaqarnertik pissutigalugu.
Isumaginninnermut naalakkersuisup, Martha Lund Olsenip, IA-meersumut Mimi Karlsenimut akissuteqarnerani tamanna atuarneqarsinnaavoq.
Inatsisartut tamatumunnga tunngatillugu aaqqissuusseqqinnerisa kingorna, unnuttaasut taakku 151-isut siusinaartumik pensionisiatik annaavaat. Taakku saniatigut innuttaasut pisartagaat ikilisinneqarput. Kisianni naalakkersuisoqarfiup taakku qanoq amerlatigineri suli paasinngilaa, Martha Lund Olsen, Inatsisartunut ilaasortamut ilisimatitsivoq.
Millionit affaat sinnerlugit
151-it ilaasa 39-t inoqutigiinni aningaasarsiaat 500.000 koruuninit amerlanerupput. Taakku aaqqissuussineq nutaaq malillugu siusinnerusukkut siusinaartumik pensionisiarisinnaasamik 20 procentii annaasussaavaat.
Sinnerisa 112-it inoqutigiinni aningaasarsiaat 149.383-it 500.000 koruunillu akornannik amerlassuseqarput.
Taakkunannga 42-t namminerisamik aningaasarsiaqannginnamik, aaqqissuussineq nutaaq naapertorlugu siusinaartumik pensionisiat qaffasinnerpaaffissaannik pisartagaqartussanngortitaassagunik aaqqissuussinermut nutaamut ikaarsaariarnermi tunniunneqartartut qaffasinnerpaaffissaasa 20 proceriannik pisartagaqarsinnaatitaassapput.
Kisermaat
151-it ilaasa 13-it inoqutigiinni aningaasarsiaat 250.000 koruuninit ikinnerupput. Taakku siusinaartumik pensionisiat saniatigut isertitatik pissutigalugit pisartakkatik annaavaat. Taakku kisermaajunerupput, kisianni Martha Lund Olsenip naqissuserpaa, suliat misissorluarneqarsimasut aamma pisartagaqarunnaassasut.
Atuaruk: Siusinaartumik sulisinnaajunnaarnersiutillit sulilissapput
Aaqqissuussaq siulleq
Aaqqissuusseqqinneq maanna naalakkersuisoqatigiit isumaginninnermut tunngasuni iliuusaat siulliuvoq, tassani siusinaartumik pensionisiallit sulisinnaasut suliffeqarfinnukartinneqassapput.
Inatsisip piareersarlugu suliarineqarnerani Namminersorlutik Oqartussat missiliorpaat, aaqqissuusseqqinneq 2021-mi tamakkiisumik atuutileriaruni ukiumut 14 millionit koruunit tikillugit sipaaruteqarfiusarumaartoq.