Aatsitassat qaqutigoortut uranimik akoqassusiat qummut killilerniarpaa

Inatsisartunut Qeqqatalu Kommuniani kommunalbestyrelsimut ilaasortap Agathe Fontainip Siumup politikkikkut oqaaseqartartuata sapaatip akunnerani tupaallannartumik nalunaarutaa apeqquteqarfigaa, taassuma piumasarimmagu aatsitassanik qaqutigoortunik piiaanermi piiakkap uranimik akoqassusia qummut killeqartinneqassasoq. Siumup Inatsisartuni politikkikkut oqaaseqartartuata Siumut partiitut uranimik piiaaniaannartutut isigineqaqqunngilaa.

Taamaattumik Agathe Fontainip paaserusuppaa Siumup uranimut politikkia sunarpiaanersoq, aperalunilu qanoq isumaqarnersoq uranimik piiaanermi "qummut killissaq" sunaatinneraa.

– Piiaanermi qanorluuniit annertutigigaluaruni annikitsigigaluaruniluuniit piiakkaniit igitassat mingutsitsissapput. Siumumit killiliineq sumut killeqarpa? Imaappa GME qinnuteqaataa itigartissallugu piareersimasut? Karl Kristian Kruse-p erseq-qinnerusumik killiliiniarneq nalunaarutigisariaqarpaa, Agathe Fontain oqarpoq.

Siumut tupigusuutigaa
Poltikerip IA-meersup aamma Karl Kristian Krusemut itisileqquvaa qanoq isumaqarnersoq oqarami "innuttaasut toqqissisimanissaat" eqqarsaatigineqassasoq. Siumummi toqqissisimanissaq eqqarsaartiginngivippaa, partiip akuersaanngilluinnarneq atorunnaarsikkamiuk, taamaasilluni Inatsisartuni amerlanerussutilinnit tunuliaqutaqarluni uranimik qummut killissaqartinnagu piiaasoqarsinnaasoq.

Agathe Fontainip tupigusuutigaa Siumup uranimut akuersaanngilluinnarneq atorunnaarsikkamiuk sooq innuttaasut toqqissisimanissaat saqqummiutinngikkaa.

– Tunngaviusumik aalajangiineq imaan-naangiqisoq ataasiinnarmik amerlanerussuteqaqqalaarluni pivoq. Sooq taamanili innuttaasut toqqissisimanissaat eqqarsaatigineqarsimanngila?, taanna aperivoq.

Sapaatip akunnerani siusinnerusukkut nalunaaruteqarnermini Siumup politikkikkut oqaaseqartartua erseqqissaavoq "aatsitassat qaqutigoortut uranimik akoqalaartut misissorneqarlutik avatangiisinut uumasunut inunnut il.il. sunniutai aatsaat illersorsinnaasumik ingerlanneqarsinnaassappata Siumup piiaanissaq akuerisinnaagaa".

Taassuma innersuussutigaa tamanna tunngavissaqartoq Aatsitassanut inatsimmi, tassuuna qinnuteqaatit ataasiakkat nalilersorneqartarmata. Tamannalu Siumup uranimut politikkimini tunngavigaa, taanna oqarpoq.

Maannali Siumut Naaakkersuisunut piumasaqalerpoq
– Taamaattumik maannakkut inuiaqatigiinnut Siumup nalunaarutigaa aatsitassanik qaqutigoortunik piiaaniarnermi uran-mik akoqarsinnaanera qummut killilerneqarnissaa, Karl-Kristian Kruse tikkuaavoq.

– Taassumalu iluani misissuinerit pereernerini suli Siumup attappaa ilumut avatagiisinut uumasunut inunnut il.il. akornusiissanngippat aatsitassarsiorneq aallartinneqarsinnaassasoq aatsaat. Tamanna ilisimatusarnermik nalunaarusiat qinnuteqaammiit qinnuteqaammut nalilersugassaasoq ilisimaarivarput. Partiit tamarmiusut aatsitassanut inatsit suliarineqarmat akuerinikuuaat, tamannalu aallaaviuvoq, Siumup politikkikkut oqaaseqartartua tikkuaavoq.

– Matumuuna Naalakkersuisunut Siumup piumasarivaa, aamma Naalakkersuisut qummut killiliinermik aallaaveqartumik suliaqassasut Siumup siunertariuarmagu inuiaqatigiit toqqissisimasut ataatsimoortullu ineriartortissallugit. Taamatut qummut killiliisoqarnissaa Siumup annertuumik pingaartillugu matumani inuiaqatigiinnut Siumut siunnerfia saqqummiuppara aatsitassanut qaqutigoortunut, aatsitassat qinngornillit saniatigooralugu qummut killilimmik piiarneqarsinnaasut nunatta inuisalu suliffeqarnikkut, akileraarutitigut allatigullu iluaqutigisinnaassagaat, Karl-Kristian Kruse erseqqissaavoq.