siulersuisut nutaat
Air Greenland piginneqataasunut agguagarsisitserujussuartoq
Naatsorsuutitigut rekordiliinerup kingorna Air Greenlandimi siulersuisunut ilaasortat ilaat Naalakkersuisut taarserpaat
Ataasinngormat Naalakkersuisut Air Greenlandimi siulersuisunut ilaasortaatitatik marluk taaserpaat.
Jens Witrrup Willumsen, 2011-miilli siulersuisunut ilaasortaasimasoq siulittaasuusimasorlu taarserneqarpoq.
Aamma Julia Pars taarserneqarpoq, taannalu 2007-imi siulersuisunut ilaasortanngortinneqarsimavoq 2011-illu tungaanut siulittaasuusimalluni, tamatumalu kingorna siulersuisuni ilaasortaannartut sulisimalluni.
Lennert Mortensen Air Greenlandimi
Jens Wittrup Willumsen naalakkersuisunit taamanikkut IA-mit aqunneqartunit toqqarneqarpoq, taamanikkut selskabini tamakkiisumik ilaannakortumillu namminersorlutik oqartussanit pigineqartuni siulersuisuni ilisimasalinnik ilaasortaatitaqalernermut atatillugu.
Siulersuisunut ilaasortanngortut nutaat aapparaa Søren Lennert Mortensen, siulittaasunngortinneqartoq.
Taanna ullumikkut illunik tuniniaasartuuvoq ukiunilu kingullerni KNR-mi pisortaasimalluni aammalu Tele-Postimi pisortaagallartutut sulisimalluni.
Tamatuma saniatigut siulersuisunut ilaasortanngortinneqarpoq Bodil Marie Damgaard, nukissamik pilersuinermik selskabimi Nukissiorfinni sulisunik ineriartortitsinermut pisortaq.
Siulersuisunut ilaasortat taarserneqarnerat pillugu Naalakkersuisut siulittaasuat Kim Kielsen (S) oqaaseqartissinnaasimanngilarput.
Agguagarsiassarpassuit
Ataatsimeersuarnermi aamma aalajangiunneqarpoq piginneqataasunut pingasunut, Namminersorlutik Oqartussanut, naalagaaffimmut SAS-imullu, aatsaat taama amerlatigisunik, tassa 274 millioner koruuninik, agguagarsisitsisoqassasoq.
Aningaasarpassuit tunniunneqarsinnaapput pissutigalugu timmisartortitseqatigiiffiup aningaasaqarnera aalajaatsuummat sinneqartooruteqarluartarlunilu.
Taamaasilluni suliffeqarfissuaq Air Greenland 2015-imi akileraarutit suli ilanngaatiginagit 90,3 millioner koruuninik sinneqartooruteqarsimavoq.
Taamaasillunilu sinneqartoorutit 2014-imit 9,6 millioner koruuninik amerlanerupput, taamanikkut 80,7 millioner koruuniusimammata.