Timmisartukkut angallanneq
Air Greenland pisortaanermik atorfinititsisoq
Air Greenlandimi siulersuisut pisortaanerungallartoq, Jacob Nitter Sørensen, pisortaanertut atorfinitsippaa aaqqissuussaanermilu annertusaallutik
Ullumi siulersuisut isumaqatigiissut Jacob Nitter Sørensen, septembarip qaammataani Air Transport Management-imi post graduate degree-tut City Universitet-imi Londonimiittumi ilinniarluni naammassisussaq, pisortaanertut atorfinitsippaat.
Annertuumik allanngortiterineq
- Jacob qaammatini qulingiluani kingullerni atorfimmi issivoq – piffissap ingerlanerani arlalinnik unammilligassaqartarsimavoq, kisiannili Jacobip akisussaaffini tamakkiisumik naammassisarsimavai aammalu ingerlatseqatigiiffimmi ingerlatsinermut ineriartornermullu sunniuteqartarsimalluni. Air Greenland attaveqaatinut nutaanut piareersarnermut atatillugu annertuumik allanngortiterisussaavoq, siulersuisullu isumaqatigiipput, Jacob ingerlatseqatigiiffimmi allanngortitsiartornerni aqutsisussatut eqqortuusoq, siulittaasoq Søren Lennert Mortensen tusagassiuutinut nalunanarummi ingerlatseqatigiiffiup arfininngornermi ualilluinnartoq nassiussaani, oqarpoq.
Aaqqissuussaanerup annertusarneqarneranut nassuiaatigineqarpoq, Air Greenlandip unammilleqatigiinnermut nutaamut allannguinissap salliutilluinnarneqarnissaata qulakkeerneqarnissaa siunertarineqartoq, tassani suliffeqarfiup ukiuni tulliuttuni mittarfiit aaqqissuuteqqinnissaannut pilersaarummi nutaami Kangerlussuup mittarfiata atorneqarnera annikillisarneqarnissaa eqqarsaatigisariaqalersimavaa.
Pisortaanerup tullia
Aaqqissuussaanermi ilanngunneqartoq pisortaanerup tulliatut atorfinippoq.
Maajip ulluisa 19-iani pisortaaneq Michael Højgaard ingerlaannaq atuutilertumik soraarsinneqarpoq. Michael Højgaardip soraarsinneqarneranut qulimiguulimmik aningaasaliinerlunneq – timmisartuutileqatigiiffimmut millionilikkuutaanik naleqartoq atorneqarsimanngisaannartorli – pissutaagunarpoq.
2000-imi timmisartortartunngortoq
Jacob Nitter Sørensen 2000-imi pilotitut ilinniarluni naammassivoq, tamatumalu kingorna ingerlatseqatigiiffimmi atorfeqarsimalluni. Jacob timmisartortartunut pisortatut atorfimmiit nuuppoq, timmisartunik sullissinerit timmisartunilu sulisut akisussaaffigalugit. Jacob timmisartortartunut pisortaanermi saniatigut aamma pilotinut pisortaasimavoq Dash 8-milu aquttuusimalluni, kiisalu training
manageritut atorfeqarsimalluni.