Akitsuutit nutaat nioqqutissat allat aksunerulernerannik kinguneqassapput
Mamakujuit, imigassat, cigaretit, puussiat, aviisitigullu neqeroorutit akitsuutaasa qaffariasaarneqarnerat nioqqutissat allat akisunerulernerannik kinguneqassaaq. Kalaallit Nunaanni niuertarfiit annersaasa ilaata, Brugsenip erseqqissaatigaa.
Kalaallit Nunaanni innuttaasut naatsorsuutigisariaqarpaat, inuussutissat nalinginnaasut siunissami akisunerulernissaat. Tamatumunnga pissutaavoq, akitsuutit qaffannissaat pillugit inatsisissamik suliaqapallassimanerup kinguneranik, Brugsenip nioqqutissat allat akii qaffaanngikkunigit, nioqqutissat ilaasa akiisigut annertuumik annaasaqartussaanera.
- Niuernermik ingerlatsineq matumani pineqarpoq, Brugsenimi nittarsaanermut pisortaq Benny Reffeldt Otte Sermitsiaq.AG-mut nassuiaavoq.
Aviisitigut neqeroortutit suliarineqareersimasut
Brugsenip aviisitut ukiup sinneranut neqeroorutit suliarereersimavai. Aviisinilu taakkunani neqeroorutit allanngortinneqassanngillat, tassa akitsuutinik qaffaasoqaraluartoq. Brugsenip taakkunatigut annaasassani matussuserniarlugit nioqqutissat allat akii qaffattariaqarpai.
- Peqatigitillugu 2020-mut isumaqatigiissuteqareernikuuvugut, ilaatigut neqeroorutit naqitat puussiallu plastikkiusut pillugit, taamaammat taakkununnga atatillugu allannguinissamut periarfissaqanngilagut, Benny Reffeldt Otte ilisimatitsivoq.
Aviisitigut neqeroorutit naqitat 64 tonsit
Brugseni aviisitigut neqeroorutissanik 64 tonsiusunik ukiumut naqiterisitsisarpoq. Aviisitigut neqeroorutinut akitsuutit nutaat taamaalillutik Brugsenimut ukiumut immikkut 320.000 koruuninik akeqartalissapput. Aningaasat akinik qaffaanikkut aaneqartussat.
Taassuuma ilisimatsitsissutigaa, puussiaq ataaseq 6 koruuninik akeqalissasoq.
- Tupigusuutigaarput, Kalaallit Nunaanni mingutsitsinnginnerusumik ingerlatsilernissaq nassuiaasiullugu akitsuutinik qaffaariasaartoqarnera. Mingutsitsinnginnerusumimmi ingerlatsinissamut peqataarusulluinnaratta arlalitsigut suliniuteqarsimavugut, ukiullu ingerlanerini assiginngitsutigut aaqqiissuteqartarsimalluta. Aalajngiinerilli taama ittut, piffissami sivikitsuaqqami sukkasuupilussuarmillu tunngavilersuuteqarluni ingerlanneqartartillugit, periarfissaqanngilluinnarpugut siunissamut isumaqatigiissutitsinik nioqqutissanillu eqqussugassanik aaqqiissuteqarnissamut. Ukiup sinneranut 2020-mullu isumaqatigiissutit siusinnerusukkut akitsuusersuinissamut tunngaviit naapertorlugit inissinneqareernikuupput, nittarsaassinermi pisortaq, aamma Brugsenimi attaveqaqatigiinnermut akisussaasuusoq oqarpoq.