Aleqa: – Attuumassuteqarpallaarnermut malittarisassat aappanut atuutinngillat

2010-mi Aleqa Hammond, taamanikkut illua'tungiliuttuulluni, Kuupik Kleist Ove Karl Berthelsenilu sakkortuumik saassuppai, nuliaat aatsitassanut akuersissummik peqarmata.
Miiti Lyngep uia aatsitassanut akuersissummik peqarpoq, tamannalu pissutigalugu Jens B. Frederiksenip Aleqa Hammondimut apeqqutigaa aappat ingerlatsinernut taamaattunut akulerussimanerat suli akerlerineraa.
– Apeqquserpara tamanna kammalaatersornerunnginnersoq peqquserluttuliornerunnginnersorlu, Aleqa Hammond 2010-mi oktobarip 16-ianni Ritzau-mut oqarpoq, ukiorlu taanna septembarip 8-anni AG nr. 36-imut oqarluni:
– Nammineq isumaqarpunga tamanna ileqqorissutsikkut ileqqulersornikkullu assuarnartuusoq.
Juunip 26-anni tamanut saqqummiunneqarpoq ineqarnermut, pinngortitamut avatangiisinullu Naalakkersuisup Mette Lyngep akuersissutini small scale minerallicens utertissimagaa, Qinigaasinnaanermut Ataatsimiititaliap attuumassuteqarpallaartutut isigimmagu. Uiali aatsitassanut akuersissuteqarpoq, 2012-imiit 2014-imut atuuttumik. Tamanna pissutigalugu Jens B. Frederiksen, Demokraatit, qisuariarpoq. Inatsisartunut ilaasortap juunip 27-anni paragraf 37 naapertorlugu Aleqa Hammondimut apeqqutigaa suli taanna isumaqarnersoq "ileqqorissutsikkut ileqqulersornikkullu assuarnartuusoq" Naalakkersuisunut ilaasortap aappaa Naalakkersuisumut attuumassuteqarpallaartumik peqarnera, qanorlu Miiti Lyngemut kinguneqassanersoq uiata aatsitassanut akuersissunni pigiinnarpagu. Juulip 10-anni akineqarpoq.
– Naalakkersuisut arajutsisaalluinnarpaat attuumassuteqarpallaarnermut malittarisassat nalinginnaasut malinneqarnissaat, aamma immikkut Naalakkersuisunut ilaasortanut ataasiakkaanut atatillugu. Aamma Naalakkersuisunut ilaasortat ataasiakkaat Naalakkersuisunngunngikkallaramik inuussutissarsiuteqarsimappata imaluunniit atorfeqarsimappata Naalakkersuisunut ilaasortaanermut atatillugu soqutigisatigut akerleriissuteqarsinnaasunik, Aleqa Hammond akissummini allappoq.
– Paasissutissiissutigineqassaaq Naalakkersuisunut ilaasortaq Miiti Lynge attuumassuteqarpallaarnermut malittarisassanik kiisalu Qinigaasinnaanermut Ataatsimiititaliap piumasaqaataanik malitsisussaaoq, Miiti Lyngep uia pinnani.