Angallat taxi sungaartoq annerpaaq

Umiarsiaatileqatigiiffeeqqami Nuuk Water Taximi inerioartorneq sukkasuumik ingerlavoq. Taamatut tusagassiorfinnut nalunaarutikkut oqaluttuarpoq ingerlatsiviup pisortaa Anders Lykke Laursen.

Illoqarfimmi angallatinik iluarsaasarfimmi Nurepami sungaartumik qalipaaneq ingerlanneqarpoq. Ukiup ataatsip iluani Targa-t nutaat pingasut singinneqartussaapput. 2019-imi upernaakkut Targa arfinilinnik ilaasoqarsinnaasoq singinneqarpoq, oktobarimilu Targa 12-nik ilaasoqarsinnaasoq singinneqarluni. Taakkua marluullutik sungaartumik qalipaateqassapput ilisimaneqalersimasup Nuuk Water Taxip ilisarnaataatut, tusagassiorfinnut nalunaarummi allassimavoq.

Aamma angallatinik passussisarfimmi Sarfaq-mi Bo Kristensen ulapippoq. Taassuma angallatit sungaartumik qalipaatillit motoorinik drev-inillu pilersugarai, atortuilu elektroniskiusut tuniniaavimmi nutaajunerpaanik pilersortarlugit.

Bo Kristensen tusagassiorfinnut nalunaarutikkut oqaluttuarpoq:

- Isumaqarnassagaluarpoq angallat angallataannaasoq. Immikkulli ittuusarpoq angallatit iluarsaasarfimmi sungaartumik qalipannerat. Aallaqqaammut isumaliorsimavunga Andersip quiasaarfiginnginneraanga. Angallat 12 meterit sinnerlugit takissusilik sungaartumik qalipallugu. Nassuertariaqarpungali tamanna atorsinnaalluartoq. Sannavitsinni maani qiimmaallaqaagut Ice Force V eqqunneqarmat.

Targa-t amerlanerit tikissapput

- Sinnattu piviusunngorpoq, Anders Lykke Laursen tusagassiorfinnut nalunaarutikkut oqarpoq nangillunilu: Nunaqavissut takornariallu angallatinik pitsaanerpaanik sullissinnaallugit – maannalu aamma ima angitigisumik peqalerluta angalaqatigiit amerlasuut angallassinnaalerlutigit.

Anders Lykke Laursen aamma allamik nutaarsiassaateqarpoq:

- Massakkorpiaq ima atorumaneqartigaagut Targamik nutaamik allamik piniarsimalluta, taannalu apriilimi tunniunneqassaaq, taamaasillunilu 2020-mi Targat sisamat atorlugit angallassisassaagut, ilaasut 30-t angullugit ilaasoqarsinnaasut.

Ukiuunera naallugu angalassaaq

Nutaatut 2019/2020-mi ukiuunerani Nuuk Water Taxi ukiuunerani uninngassanngilaq, tusagassiorfinnut nalunaarummi allassimavoq.

Angallatit ukioq kaajallallugu angalasalissapput. Qaammatini januaarimi, februaarimi marsimilu Nuuk Water Taxi sapaatip akunnikkaartumik Kapilisilliarlunilu Qeqertarsuatsiaaliartassaaq. Tamatumalu saniatigut angallatit sapaatip akunnerata ulluini tamani takornarianik angallassillutillu attartorneqarsinnaapput, Anders Lykke Laursen tusagassiorfinnut nalunaarutikkut paasissutissiivoq.

Nutaarsiassat

Tasiilami anorersuarnissaanik aarlerisaarut

DMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...

Snow Fest-imi iluatsilluartumi nutaaliorsinnaaneq nuannaarutigineqarpoq

Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...