Aningaasaliissuteqarnermi miliuunerpassuarnik annaasaqarneq
Namminersorlutik Oqartussat suliffeqarfiutaat Greenland Holding A/S ataatsimeersuarsimavoq, 2019-imullu naatsorsuutit 5,3 millioner koruuninik amigaartooruteqarfiusut saqqummiunneqarlutik.
Tusagassiorfinnut nalunaaruteqarnermi amigaartooruteqarneq "annikitsutut" taaneqarpoq, pingaarnerutinneqarlunilu Vækstfondenip taassumalu immikkoortortaqarfiata Greenland Venturep kiisalu SISA-p aningaasaliisartutut peqataalersup suleqatigiinnerat.
Aningaasat amerlanerit, sunniutai annertunerusut
- Qujanarpoq suliffeqarfissuaq Greenland Holding aningaasaliissutit nutaat atorlugit suliffissaqartitsinerulernikkullu Kalaallit Nunaanni tamarmi inuiagaqatigiit aningaasaqarnerannik annertunerulersitsinera. Aningaasatigut angusat eqqarsaatigalugit pingaartumik suliffeqarfinnik nutaanik aallartitsinissamut aningaasalersuinerit, minnerunngitsumik aatsitassarsiornerup ineriartortinneqarnerisa ukiunilu kingullerni aningaasalersuisarnermik killilersuinerulernerup suli ajornartorsiutaanerat nammineq pigisani nammineq pigisatta arlallit nalinginik annikitsumik appaanitsinnik kingunerpoq, siulersuisuni siulittaasoq Christian Motzfeldt tusagassiorfinnut nalunaaruteqarnermi nassuiaavoq, nangillunilu oqarluni:
- Tamannali ingerlatsinitsinnut annertunerusumik sunniuteqanngailaq taamaammallu Kalaallit Nunaanni suliffeqarfinnut qaffasissumik aningaasalersuisarnerput ingerlateqqissinnaavarput ingerlatseqqissalugulu, siulersisuni siulittaasoq piffissamut ungasissumut aningaasaliissuteqarsimanermik erseqqissaasoq oqarpoq.
Ingerlaannartumik iluanaaruteqartoqassanngitsoq
- Piffissaq sivisooq ingerlassaaq, qularnanngilarlu aningaasatigut pissarsiat annertusinnginneranni suliffeqarfiit arlallit atugarliussasut. Pingaartuuvoq erseqqissassallugu, suliffeqarfissuarmi Greenland Holding-imi siunertaq pingaarneq tassaasoq siuariartornerusoqarneratigut amerlanerusunillu suliffissaqalernikkut inuiaqatigii aningaasaqarneranni pissarsiviulluarnissaasa qulakkeerneqarnissaa, tassanilu pingaaruteqartunik pissarsereernikuuvugut.
Christian Motzfeldtip ilisimatitsissutigaa, aningaasaliissutit 220 millioner koruuninik annertusinissaat pillugu Kalaallit Nunaata Danmarkillu akornanni politikkikkut isumaqatigiissutip inissinnissaanut piffissangaatsiaq ingerlasimasoq. SISA-llu suleqataalerneratigut aningaasat 300 millioner koruunit sinnillit aningaasaliissuteqarnissamut atugassanngorsimasut.