Asii: Mittarfik illoqarfimmut ajortumik ilisarnaataalersinnaavoq
Mittarfittaassaq Nuummut ajortumik ilisarnaataalersinnaanera, kommuneqarfiit pingaarnersaata aarleqqutigaa.Kalaallit Airports
ASN-ip tusarniaavigineqarneranut akissuteqaammi Kommuneqarfik Sermersuup ASN-imik nalunaarusiaq tusarniaavigineqaqqammertoq pillugu sakkortuumik isornartorsiuivoq.
Maannakkut suliniut annertuumik amigaateqarpoq, mittarfissallu Nuummut ajortumik ilisarnaateqalersitsinissaa aarlerinaateqarluni, borgmester Asii Chemnitz Narup Avatangiisimut Naalakkersuisoqarfimmut allappoq.
Qulequttat arlallit isornartorsiorneqartut
Kommuni avatangiisimut isikkimullu tunngasut immikkoortillugit quppernerni sisamamni isornartorsiuivoq
Nipiliortitsinermut sajutsitsinermullu pillugit kommunip piumasaraa, ”nipiliortitsinissamut killigititaasut qaangiisoqartuaannarnissaa inerniliunneqassappat taava pinaveersaartitsilluni iliuutsinut tunngasut sulissutigineqartariaqartut”.
Kommunip sanaartukkamut tassunga assigusumik sanaartugaasimasut tikkuarpai, taakku innuttaasunit eqqugaasunit annertuumik iluarineqaratillu naammagittaalliutigineqartarsimapput.
Illunik innarliinerit
Kommunip ilanngullugu tikkuarpaa, ”sanaartorfimmi minnerusumi tassungali assigiusumik sanaartorfiusumi, sajutsitsinikkut illunik innarliisimasoqarnera ininiliunneqarsimasoq”. ASN-imik nalunaarusiami inerniliunneqarpoq, qaartitsiserisoqarneranit sajutsitsinerit inissianut ”700 meterit missaanni ungasitsigisumiittunut” sunniuteqarunnanngitsoq.
Kommunillu ilimagaa, nalunaarusiami oqaatigineqarsimasumit ”inissiat arlallit 700 meterimiit qaninnerusut”
Pujoralak
Kommunip aamma ermummatigaa, ASN-imik nalunaarusiami annertuumik qaartitserinerit ujaqqanillu aserorterinerit nipiliortitsinissamut ASN-imi naapertuutinngitsut, piumasarineqarlunilu pujoralaat anorimit teqqalatinneqarnissaa uuttoortarneqassasoq.
Kommunip aamma paasisimavaa:
- Tamakkiisumik CO2-mik aniatitsinissaq ilanngunneqarsimanngitsoq
- Qaartitserinerup kingorna dielselolie 11 tonsi qimanneqassaaq. Taama annertutigisoq pinngortitamut qanoq sunniuteqarsinnaanera maluginianngitsoorneqarsinnaanngilaq.
- Mittarfik qanoq ililluni panersarneqarnissaa pillugu diagrammit takussutissiisussat amigaataapput
- Pinaveersaartitsinissamut iliuusissat naammaginanngillat
- Sanaartornerup nalaani lastbilit atorneqartussat, Nuummi angallannerup mianernareersumut eqquinerlussinnaanera ernumassutigineqarpoq. Tamanna pissutigalugu kommunip qulakkeerusuppaa, aqqusernit atorneqangaatsiannginnissaat anguniarlugu ujaqqat sanaartorfiup qanitaanut iliorarneqassasut.
Avatangiisimut piumasaqaatit
Pinngortitamut, Avatangiisimut Ilisimatusarnermullu Naalakkersuisoqarfik tusarniaanermut akissuteqaatinik suliniummullu nutaanik piumasaqaasersuinissamik suliaqassaaq, taakkulu Naalakkersuisunit aalajangiiffigineqassapput. Aalajangiisoqarneratalu kingorna sanaartortitsisup, Kalaallit Airportsip, suliariumannittussarsiuinermi piumasaqaatit arlallit sanaartortartunut saqqummiunneqarnissaannik qulakkeerinnissaaq.
DMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...