Asii: Sermersooq kingulliutinneqaqqippoq

- Suliffissaaleqinerujussuup annikillisarneqarnissaanut Naalakkersuisut arlalinnik suliniuteqarniarlutik aalajangersimanerat naammaginartuuvoq. Kisianni Naalakkersuisut Kommuneqarfik Sermersooq sanaartugassanut tunngasuni kingullinngortimmagu eqqarsarnartoqarpoq.

Kommuneqarfik Sermersuumi borgmesteri Asii Chemnitz Narup Inuit Ataqatigiinneersoq tusagassitinut nalinaaruteqarpoq.

Sermitsiaq.AG-mit 'Suliffissaaleqisut suli amerliartorput' allaaserineqarpoq, nunatsinni suliffissaaleqisut suli amerliartortut eqqartorneqarluni.

Martsimi nuna tamakkerlugu suliffissarsiortutut 4.385-it nalunaarsorneqarsimapput, ukiumi siuliani piffissami tassani 3.946-iullutik, 439-nik amerleriarsimallutik.

- Ajoraluartumik allaanngivippoq, Naalakkersuisut partiimi politikkikkut eqqarsaatit pisariaqartitsivinneq pinngau pingaarnerutikkaat, tamannalu kukkunerulluinnarlunilu akisussaassuseqanngitsumik qisuariarneruvoq, Asii Chemnitz Narup oqarpoq.

Suliffissaaleqinerup annertusiartornera assigiinngitsutigut annikillisarniarneqassaaq. Tamanna tunngavigalugu Asii Chemnitz Narup isumaqarpoq, Naalakkersuisut suliffissaaleqinerup annikillisarneqarnissaanut maannakkorluinnaq sanaartornerup iluani aallartitsissappata isumatusaarnerussasoq, peqataanillu Piareersarfimmut amerlanerusunik aningaasaliissuteqarlutik, inuusuttut amerlanerit ilinnialernissaminnut piareersalerniassammata.

- Suliniutit tamakkua suliffissaaleqisunik amerlanerusunik sulerusuttunik periarfissaqartitsinerulernissaat qularutissaanngilaq, peqataanillu aamma pingaartuuvoq, sanaartornermi aallartingajalersumi suliffimmik sungiusarfissanik amerlanerusunik pilersitsisoqarnissaa isumannaartariaqaratsigu, tamaasiornikkut inuusuttut ilinniakkaminnik naammassinninnissaannut ikiorserniassagatsigit. Taamaasiornikkut ataatsikkut marlunnik pissarsissaagut; suliffissaaleqineq appartissinnaavarput, ilinniagaqarnerullu iluani suliffimmik sungiusarfissanik amerlanerusunik pilersitsinikkut uummarissaasinnaalissalluta. Taamaasiornikkut illugiinnik pissarsisoqassaaq, Kommuneqarfik Sermersuumi borgmesteri oqarpoq.

Nuuk nukittooq atorfissaqartinneqarpoq
Taamaakkaluartoq, Asii Chemnitz Narup Naalakkersuisut suliniutaat pillugit talini tamaasa quleralugit tulluusimaanngilaq. Piffissaq ungasinnerusoq isigalugu periusissamik maqaasisaqarpoq, aammalu Naalakkersuisut Kommuneqarfik Sermersuumik salliutitsinnginnerat aammaarluni naammaginngitsorujussuaa, ilaatigut Sanaartugassanut Iluarsagassanullu Aningaasaateqarfiup aningaasaliissuteqarneranut tunngatillugu.

- Nunarput nukittuumik illoqarfiit pingaarnersaqarnissamik pisariaqartitsivoq. Nuup aningaasatigut qaffariartornera imaluunniit aningaasakillisaarfiulernera ullut tamaasa nunap sinneranut tuniluuttarpoq. Tamannaannaq pissutigalugu innersuussutigerusuppara, siunissaq eqqarsaatigalugu Nuuk aammalu Kommuneqarfik Sermersooq ullumikkornit pingaarnerutinneqassasoq. Tassunga atatillugu aamma eqqaamassallugu pingaartuuvoq, Kommuneqarfik Sermersooq tassaammat Paamiut, Tasiilaq, Ittoqqortoormiit nunaaqarfiillu arlaqartut, Asii Chemnitz Narup naqissusiivoq, suliffeqarnerullu iluani ungasinnerusumut pilersaarusiortoqartariaqarnera erseqqissaatigalugu.

Suliffeqarnermut politikki
- Siunissaq eqqarsaatigalugu ungasinnerusumut ataqatigiissumillu suliffeqarnermut tunngatillugu politikkiliortoqartariaqarpoq, inuiaqatigiit agguataarnerannik, nuttartarnermik aammalu sanaartugassanik pisariaqartitsinerannik aallaaveqartumik. Tassunga atatillugu sulisinnaasut tamaasa ataatsimut qaffassarnissaat qitiutinneqassaaq, ilinniartitanerup, ilinniaqqitsitsinerup, suliffinnik misiliiffiit, inersumasutut lærlingit qitiutinnerisigut. Taamaasiornikkut mannakkorpiaq takussaalersutut tamatigut tamaana suliniuteqartarnerit aallartitsisarnerillu siunissami qularnanngitsumik pinaveersaalissagaluarpavut, Asii Chemnitz Narup oqarpoq.