Qaqortoq
Assit takukkit: Qaqortumi akerliussutsimik takutitsisut aatsaat taama amerlatigisut
Innuttaasut 500-t kiffartuussinissamut isumaqatigiissutinut akerliunertik takutippaat
Marlunngornermi ualikkut Qaqortormiut 500-t kiffartuussinissamut isumaqatigiissutinut nutaanut akerliunertik takutinniarlugu illoqarfiup qeqqanut takkupput.
Ingerlaaqatigiit illoqannginnersami naapipput, Pisiffiup tungaanut ingerlaarput, tassanngaanniillu kommunip allaffianut - naggataatigullu heliportip saavani unipput.
Akerliussutsimik takutitsinissamut allagartarsualiortoqarsimavoq, taakku kiffartuussinissamut isumaqatigiissutinut nutaanut iluarinnginninnermik oqariartuuteqarput.
Oqalugiarnerit arlallit
Heliportip saavanik oqalugiartoqarpoq, siullermik Monica Dorph, taanna aaqqissuussisut ilagaat, taassuma kingorna kommunimi inuussutissarsiornermut ataatsimiititaliap siulittaasua, Simon Simonsen, kiisalu kommunalbestyrelsimi ilaasortaq Stine Egede.
Nanortalimmi akerliussutsimik takutitsinermut assingusumi inuit 100-t missaaniittut peqataapput.
Oqaaseqartup Monica Dorphip aamma ilisimatitsissutigaa, angallannermut kiffartuussinissamik isumaqatigiissutinut akerliunnermik malunnartitsineq tamanna kingulliunavianngitsoq.
Allaaserisap uani ataani assit takukkit