Atuisut nutaat Greenland Oil Spill Response annaatissavaat
Uuliasiornermik ingerlatseqatifiiffissuit ujaasillutik suliaqarnertik taamaatimmassuk, ingerlatseqatigiiffik Namminersorlutik Oqartussanit pigineqartoq amigartoorluni ingerlavoq.
Ingerlatseqatigiiffik Namminersorlutik Oqartussanit pigineqartoq, Greenland Oil Spill Response, amigartooruteqarluni ingerlanneqarpoq. Kisianni tamatuma ineriartornerup muminneqarnissaa sulissutigineqarpoq.
Ingerlatseqatigiiffik uuliakoortoqassagaluarpat akiuiniartussaq, 1 millionit koruuniinnarnik kaaviiaartitaqarluni siorna 3 millionit koruuninik amigartooruteqarpoq. Tamanna tupinnarpallaanngilaq, tassami Kalaallit Nunaata avataani uuliasiornissamik misissuineq qaffasinnerpaaffissaminiimmat. Maanna misissuinerit uninnganeranni, ingerlatseqatigiiffik isertitanik amigaateqarpoq.
- Nierfitta annertusarnissaa sulissutigaarput, Klaus Kuch Jensen, ukiumit nutaamit ingerlatseqatigiiffimmi pisortanngortoq oqaluttuarpoq.
Cairnip 2012-imi misileraalluni qillerineranut atatillugu ingerlatseqatigiiffik 2012-imi pilersinneqarpoq. Cairnip uuliakoortoqarneranut akiuinermut atortuni Namminersorlutik Oqartussanut tunniuppai. Tamatuma kingorna inatsisitigut aalajangerneqarpoq, ingerlatseqatigiiffiit kalaallit imartaanni uuliasiortut tamarmik, Greenland Oil Spill Responsemut ilaasortanngortassasut.
Maanna akuersissutit arfineq-marluupput, piginnittunut tallimanut agguataarneqarlutik, taakku Greenland Oil Spill Responsemut ilaasortaasussaapput. Taamaattorli akuersissutaatilli uani sæsonimi suliaqarnissaat naatsorsuutigineqanngilaq, tamannalu aamma Greenland Oil Spill Responsep isertitaqarnissaanut sunniuteqarpoq.
Illersornissaqarfimmik suleqateqarneq
Maanna alloriarnissaq nutaaq aalajangersimasoq tassaavoq, illersornissaqarfiup suleqatigineqarnissaata sulissutigineqarnera.
- Illersornissaqarfiup atortuinik paarsineq aamma aserfallatsaaliineq tigunissaat eqqarsaataavoq, Klaus Kuch Jensen oqarpoq. Ataatsimut sungiusaqatigiittoqartarnissaa kiisalu ataatsimut ilaatigut kajumissutsimik suleqatigiinnik, sumiiffinni assigiinngitsuni suliaqarnermi atorneqarsinnaasunik pilersitsinissaq eqqarsaataasoq aamma oqaatigaa.
Greenland Oil Spill Response ullumikkut Nuummi aamma Aasianni umiarsualivinni atortunut toqqorsiveqarput. Atortut ataavartumik misissorneqarlutillu aserfallatsaalineqartarput, ullut ilaanni ajutoortoqassagaluarpat atorsinnaanissaat qulakkeerniarlugu. Taamaattumik ingerlatseqatigiiffiup illersornissaqarfiup atortuinik tigusinissaq pitsaasuussasoq, pisortaq isumaqarpoq.
Aatsitassarsiornermik sulialinni periarfissaqartoq
Tamatuma saniatigut aatsitassarsiornikkut periarfissat takusinnaavai. Tassami aatsitassarsiornermik suliniutit tamarmik uuliamik toqqorsinissamik pisariaqartitsisarput, ilaatigut innaallagissiornermut atugassamik. Greenland Oil Spill Responsep atortui sinerissamut qanittumut ikummatissaasiviit isumannaarneqarnerinut atorneqarsinnaaput, piginnaasaallu aamma uulianut nappartat pinngortitamiilinnginnissaannut atorneqarsinnaallutik.
- Tamatuma saniatigut aamma umiarsualivinni uuliamik orsiisoqartillugu isumannaallisaasuusinnaanerput periarfissatut isigaara. Orsernerup nalaani umiarsuaq kaajallallugu puttasumik assiaqusiisoqarpat, uuliap ilaa kuineqarpat, uuliap avatangiisinut pinnginnissaa qulakkeerneqarsinnaavoq.
Tamanna aamma umiarsuarnut takornariartaatinut atuussinnaavoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...