Avaleraasartoorniarnerup iluatsinngitsoornera aalisariutileqatigiiffiup akisunaaraa
Arctic Prime Fiskeries ApS, Jørgen Wæver Johansenip piginneqataaffigisaa siulersuisuinilu siulittaasuuffigisaa, siorna avaleraasartoorniarneq iluatsinngitsoormat aningaasatigut ajutooruteqarujussuarpoq.
Ingerlatseqatigiiffiup 2019-imut naatsorsuutini ullualunnguit matuma siorna tunniuppai, ukiumut angusaanni takuneqarsinnaavoq 20 millioner koruuninik amigartooruteqarsimasoq. Ukiup siuliani ingerlatseqatigiiffik 17,5 millioner koruuningajalluinnarnik sinneqartoorsimalluni.
Nammineq aningaasaatai minus 168 mio. koruuniupput.
Aqutsisut nalunaarutaanni takuneqarsinnaavoq, ukiumut angusarineqarsimatut ”naammaginanngitsut”, ingerlatseqatigiiffiulli nammineq aningaasaatai minus 168 millioner koruuniugaluartut, isumaqartoqarpoq ingerlatseqatigiiffik siunissagissaartoq.
- Ingerlatseqatigiiffiup ukiut siuliini angusarisartagai pitsaasuupput. 2020-mi kattuseqarteqarsimaneq kiisalu ingerlatseqatigiiffiup 2020-mi kilisaammik nutaamik atugaqalersimanera eqqarsaatigalugit, ingerlatseqatigiiffik siunissagissaartutut oqaatigineqarsinnaavoq. Ingerlatseqatigiiffimmut taarsigassarsisitsisimasut aningaasatigut tapiissuteqartarnerminnik ingerlatsiinnarnissamut akuersaarsimapput, taamaammat ingerlatseqatigiiffiup ineriartortuarnissaata, ingerlanneqarnissaata siunissamilu ingerlaannarnissaata qularutiginissaanut tunngavissaqanngilaq, nalunaarusiami allassimavoq.
Aaqqissugaanera ingerlanneqarneralu pitsaanerulersinneqarsimasoq
Aqutsisut ilanngullugu oqaatigaat, immikkoortortaqarfiit marluk qullersaqarfimmut ukioq manna kattutsinneqarsimasut aamma ingerlatseqatigiiffiup aaqqissugaanera ingerlanneqarneralu pitsanngorsaaffigineqarsimasoq.
2019-mi kisitsit pingaarnerit
Kaaviiaartitat: 243 mio. kr.
Iluanaarutit tamakkerlugit: 91 mio. kr.
Akileraarutit suli peernagit angusat: -18 mio. kr.
Ukiumi angusat: -20,7 mio. kr.
Nalimmaassatit: 416 mio. kr.
Nammineq aningaasaatit: -168,2 mio. kr.
- Ingerlatseqatigiiffik Tunumi allanngujaatsunik saarullittassinneqartarpoq, kiisalu Kalaallit Nunaanni ikerinnaasiortunik allanngujaatsunik pisassinneqartarpoq, taamatut pisassinneqartarnermigut ingerlatsinermi angusarisartagai akileraarutissallu suli peernagit angusarisartagai siunissami pitsaanerulersinnaapput. Taamatuttaaq naatsorsuutigineqarpoq, Nanortalimmi suliarisartakkat pitsaasumik ineriartortuarnissaat, tassa ingerlatseqatigiiffiup qerisunik assiivimmut aningaasaliissuteqarsimanerata, taassumalu malitsigisaanik tunisassiornerup patajaannerulernerata malitsigisaannik. Aqutsisunit naatsorsuutigineqarpoq, ingerlatsinermut atortunullu aningaasaliissuteqarsimaneq kiisalu isumannaallisaasimaneq il. il. siunissami ingerlatsinermi sinneqartoortitsilissasut, ingerlatseqatigiiffiup taamaalilluni akileraarutigineqartussanngortut atorsinnaalissavai.
Kukkunersiuisut oqaaseqaataat
Aqutsisut nalunaarutaanni akileraarutigineqartussanngortitanik 41 millioner koruuniusunik atuisoqarsinaaneranik oqaaseqarnermut pissutaavoq, kukkunersiuisut nangaanartoqartitsinerat. Kukkunersiuisoq naalagaaffimmit akuerisaasoq Allan Pedersern Deloittemeersoq allappoq:
- Suliffeqarfissuup qullersaqarfiullu ulloq 31.12.2019-imi nalimmassaanerani, akileraarutigineqartussat 41 mio. koruuniusut kinguartinneqarsimanerat ilanngunneqarsimavoq. Akileraarutissat kinguartinneqarsimasut ukiut tallimat ingerlaneranni atorneqarsinnaanerat pillugu uppernarsaammik pissarsisimanngilagut, taamaammllu akileraarutissat kingutitata nalingisa naatsorsorneqarsimanerat nangaanartipparput.
Siulersuisuni marluk ilaasortaajunnaarsimasut
Ingerlatseqatigiiffiup pisortaa Malakias Jens Daniel Andreassen, Magnus Helgi Arnasonimik peqateqarluni siulersuisunit tunuarsimapput, siulersuisut ullumikkut tallimanik inuttaqartut tassaapput:
Jørgen Wæver Johansen, siulersuisuni siulittaasoq
Robert Møller
Hentzar Petersen
Gudmudur Kristjansson
Jonas Engilbertsson