Greenland Express Air
BH Air: Greenland Express Air akiliinngisaannarsimavoq
Aasaq manna Greenland Express Airimik timmisartuussisussaasimavoq, BH Airili naapertorlugu isumaqatigiissut atuutilinngisaannarsimavoq. Maanna bulgariamiut suna pissutaanersoq - Gert Braskillu selskabianik attaveqarsimaneq tamaat oqaluttuaraat
– Ilisimasimanngilarput Greenland Express Air billetsinik tuniniaasimasoq.
Taama ersaritsigisumik oqarpoq BH Airip tuniniaanermut ussassaarinermullu pisortaa Lachezar Lazarov, Sermitsiaq.AG-p oqaluttuummani Greenland Express Airip timmisartuussisalernissaminut selskabia tunuliaqutamisut atorsimagaa.
Tamanna assersuutigalugu pivoq Greenland Express Airip pisortaanerata Gert Braskip juulip 4-aanni tusagassiorfitsigut nalunaarummini. Tassani allappoq Greenland Express Airip BH Air isumaqatigiissuteqarfigisimagaa.
Taamaattumik aamma BH Air - Angallannermut Aqutsisoqarfiup akuersissutaa atorlugu - Danmarkip Kalaallillu Nunaata akornanni timmisartuussisussaasimavoq.
Lachezar Lazarovili naapertorlugu isumaqatigiissuteqartoqarsimanngilaq.
– Juunip aallartinnerani Greenland Express Airimit attaveqarfigineqarpugut, timmisartuussisalernissaminut timmisartortitseqatigiiffimmik atorfissaqartitsigami. Piumasaqaatitsinnik neqeroorfigaavut, tamakkualu ilagaat kiffartuussinitsinnut assigiinngitsunut tamanut qaammat ataaseq siumut akilerneqartassasugut. Ersarissorujussuarmik oqaatigaarput siumut akiliinissaq timmisartuussinissatsinnut piumasaqaataasoq.
Bulgariamiut akileeqqusipput
BH Airip tuniniaanermut ussassaarinermullu pisortaa naapertorlugu aningaasat ajornartorsiuterujussuusimapput:
– Akuersissutip (Angallannermut Aqutsisoqarfimmit, aaqqiss.) tiguneqarnerata nalaani paasinarsivoq Greenland Express Air akiliisinnaanngitsoq. Sivisoorujussuarmik utaqqereerluta Greenland Express Air nalunaarfigaarput timmisartuussinissat ingerlanneqassanngitsut ingerlaannavik akiliisoqanngippat. Akiliisoqanngilaq, timmisartuussinissallu tamarmik taamaatinneqarput.
Pisortaanerulli Gert Braskip Greenland Express Air sinnerlugu aalajangiusimavaa BH Air pituttorsimasumik isumaqatigiissuteqarfigineqarsimasoq. Taamaasiorpoq ullumi siusinnerusukkut Sermitsiaq.AG-mut email-ikkut, tassuuna isumaqatigiissut juunimi atsiorneqarsimasoq innersuussutigalugu.
Tassa bulagariamiut isumaqanngitsut timmisartuussinissamut pisussaaffeqaratik, Greenland Express Airip billetsileriffianut iserniaraanni taakkua saqqummertarput. Assersuutigalugu kingullermik timmisartuussinissamut pilersaarummut oktobarip 23-annut inniminniinermi BH Air timmisartuussisussatut allassimavoq.
Assip ataani billetsimik inniminniinermit screen-dump takuuk