Eqqartuussissuserisoq: Nunanit allamiut aningaasarsiaat nakkutigiuminaapput
Eqqartuussissuserisoq Peter Giersing naapertorlugu imaasiallaannaq paasiniarneqarsinnaanngilaq assersuutigalugu kinamiut nunatsinni sulisut qanoq aningaasarsiaqarsinnaanerat
Soorlu naluneqanngitsutut maanna Folketingimi politikerit aalajangiisussanngorput qallunaat inatsisartuisa Inatsisartuni amerlanerussuteqartut innersuutaannik akuersaassanersut, nunatsinni suliniutinut angisuunut inatsisissaq amerlanerussuteqartunit akuersaarneqarnerata nassataanik nunanit allanit ingerlatsiviit Kalaallit Nunaanni aatsitassarsiornissaannut ammaaffigineqarput nunani allani sulisunut akissaasersueriaatsit naapertorlugit.
Aallaavigineqarpoq nunatsinni akissaatigitinneqartut appasinnerpaartaat nal. ak. 81 koruunit, aningaasarsianilli taakkuninnga ingerlatsiviit sapaatip akunneranut 1050 koruuninik ineqarnermut nerisaqarnermullu, sulisut angalanerinut aamma sillimmasiinernut ilanngaasinnaatitaapput. Tamakkua akilereerlugit aningaasarsiat nal. ak. 52 koruuninngussaaq.
Sulili appasinnerulersinnaavoq, nunatsinni pissutsinut immikkut ilisimasalik Peter Giersing naliliivoq.
- Tamakkua nakkutigineqarsinnaanngillat. Aamma qanorluunniit piumatigigaluaraanni. Kiammi malittarisassat naapertorlugit ingerlatsisoqarnersoq nakkutigissagamiuk? Imminut nakkutigissaaq isumaqanngilangalu tamanna tatiginartuusoq, Peter Giersing Politikenimut oqarpoq.
Qallunaat naalakkersuisuisa kalaallit akuersaarnerat taperserpaat
Qallunaat naalakkersuisuisa suliniutinut angisuunut pilersaarutit unitsinnavianngilaat, naaka Enhedslisten aamam Dansk Folkeparti kamassimagaluaqisut.
Dansk Folkepartimi siulittaasoq, Kristian Thulesen Dahl, sukkanerpaaq atorlugu Venstre aamma De Konservative saaffiginiarpai kalaallit suliniutinut angisuunut inatsisissaata politikkikkut amerlanerussuteqarluni unitsinneqarnissaa anguniarlugu.