Nersornaat
Feeriartitsisarnermut nersornaat akimasoq
Akisuumik angalatitsinermik aaqqissuussinermut Arne Hardenberg nersornaaserneqaqqammerpoq
Greenland Extreme misigisassarsiorluni akisuumik angalanerni nunarsuarmi aaqqissuisut pitsaanersaraat. Tassa atuagassiaq Luxury Travel Guide upperissagaanni.
Atuagassiaq ukiut tamaasa akisuunik angalatitsinernut nersornaatinik agguaassisarpoq.
Atuaruk: Heliskertitsisalerniarpoq
Nunarsuaq tamakkerlugu ajugaasoq
Londonimi nalliuttorsiortitsinermi Greenland Extremesip piginnittuata Arne Hardenbergip nersornaat 'Adventure Tour operator of the Year' pissarsiaraa. Tamanna Facebookimi quppernerani takuneqarsinnaavoq. Tassani innersuunneqartut tallimat allat ajugaaffigai.
Atuagassiap sumiiffiit ataasiakkaanit ajugaasut siullermik toqqartarpaat, taakkulu nunarsuaq tamakkerlugu unamminermut ingerlaqqittarput.
Atuaruk: Takornarianik angallassisartumut maanimiumut nersornaat kusanartoq
Nuannaariussuarmik angalatitsinerit
Greenland Extreme ilaatigut heliskiingertitsinermut, piniartitsinermut aalisartitsinermullu angalanernut aaqqissuulluakkanut naleqqussarluarsimavoq. Takornarianulli nammineq nuannaariussuarminnik Nunatsinnut tikeraartunut, ingerlatseqatigiiffiup neqeroorutaat aallaaveqarput.
Arne Hardenberg tassani pisisartut pisuut nuannarisaat malillugit misigisassanik katiterisarpoq, taannalu Kalaallit Nunaata pinngortitami misigisassaataanut sunulluunniit tunngasinnaasarpoq.
Video takuuk: Filmip ussassaarutip heliskiingerneq pilerisaarutigissavaa
Aningaasaateqarluartariaqarneq
Greenland Extremep angalatitsinerinut annernut ilaaniaraanni, aningaasaateqarluarnissaq pisariaqarpoq. Sapaatip-akunnera heliskiingerneq 8.000 euronik akeqarpoq, tassa 60.000 koruunit missaat.