GME uranitalinnik piiaasinnaatitaavoq

En tilføjelse til Greenland Minerals and Energy efterforskningstilladelse ved Kvanefjeldet omfatter nu også tilladelse til radioaktive mineraler

GME atortussiassanik uranitalinnik aamma misissuisinnaatitaalerpoq. Ass.: Ludvig Siegstad

redaktionen

sisamanng 01. dec 2011 13:26

Greenland Minerals and Energyp Kuannersuarni misissuinerinut atatillugu atugassarititaasunut tunngassuteqartut ilassuteqarfigissallugit Naalakkersuisut aalajangerput. Aalajangernerup kingunerisaanik suliffeqarfik misissuinerminut atatillugu aatsitassanik radiop qinngornerinik ulorianartunik killissarititaasut qaangerlugit akulinnik misissuisinnaalissaaq.Aalajangernermut tunuliaqutaasoq tassaavoq ingerlatseqatigiiffiup Naalakkersuisunut nalunaarutigisimammagu ingerlatseqatigiiffiup imminut akilersinnaassutsimut misissuinernik taaneqartartut kiisalu suliaqarfissami avatangiisinik, peqqinnissamut aammalu inuiaqatigiinnut sunniutaasussanik nalilersuinerit naammassisinnaassagunigit, qinngornerit ulorianartut akuusut ilanngullugit pisinnaatitsissummut killissarititaasut ersarinnerusut ingerlatseqatigiiffiup pisariaqartikkai.Misissuinissamut akuersissutip allannguutaani ersarissarneqarpoq, Greenland Minerals and Energy pinngoqqaatinik qinngornernik ulorianartunik akulinnik piiaanissamut akuersissummik tunineqarnissamut pisinnaatitaaffeqanngitsoq.

Taamaattumik aalajangerneq Naalakkersuisooqatigiit Qoornumi isumaqatigiissutaanik sanioqqutaarinngilaq, tassanimi Naalakkersuisut akuersaanngilluinnarnissamik isumaqatigiissutertik attatiinnarniarlugu isumaqatigiissutigaat aammalu tamatuma allanngortinneqarsinnaanerata nalilersorneqartarnissaa isumaqatigiissutigineqarluni. Nalileeqqinneq pisinnaassaaq aatsitassarsiorluni misissuinerni aatsitassat radiop qinngornerinik ulorianartunik killissarititaasut qaangerlugit akullit isumannaallisaanermut, peqqissutsimut avatangiisinullu sunniutigisinnaasaat pillugit paasissutissat naammattut nutaajunerpaallu pigineqalerpata.

GME sumiiffimmi pineqartumi misissuinernit aatsitassanik akulimmik piiaaffigineqarsinnaasumik 619 Millioner tonsinik annertussusilimmik nassaarsimavoq. Tassani aatsitassat qaqutigoortut 6,6 millioner tonsinik annertussusillit, 350 millioner pund uran-oxid aamma zinki 1,3 millioner tonsi piiarneqarsinnaasussatut sumiissusersineqarlutik.

Kuannersuarni aatsitassat nassaarineqartut uran-imik thorium-imillu akui akuersaanngilluinnarnissamik killiliussat qaangingaatsiarujussuarlugit qaffasissuseqarput.

Taqqavani aatsitassarsiorfiliortoqassagaluarpat aningaasartuutissat 12,5 milliarder koruuninik amerlassuseqarnissaat naatsorsuutigineqarpoq. Piiaanissamik akuersissummik tunniussisoqassagaluarpat naatsorsuutigineqarpoq ukiumut aatsitassanik qaqutigoortunik uran-oxid-italinnik 43.000 tonsinik tunisassiortoqartarnissaa.

GME ilisimatitsivoq naatsorsuutigalugu suliniutip imminut akilersinnaassuseqarnera paasiniarlugu misissuinerit aammalu peqqissutsimut, avatangiisinut inuiaqatigiinnullu sunniutigisinnaasai paasiniarlugit misissuinerit 2012-ip naajartornerani naammassissallugit, kiisalu piiaasinnaanissamik qinnuteqaat 2012-ip ingerlanerani tunniutissallugu.